Ministerio Publico a finalisa awe e investigacion penal ‘Magenta’ contra e sospechoso R.J.H. via un transaccion di mas di un miyon florin.
E investigacion aki a wordo hiba door di RST (Recherchesamenwerkingsteam) bao guia di un fiscal di husticia di Ministerio Publico di Aruba.
R.J.H. ta wordo sospecha di a intencionalmente viola articulo 68, paragrafo 2, di Algemene Landsverordening Belastingen (ALB).
E ta wordo acusa di a comete varios delito fiscal durante e periodo di 2017 te cu 2022, cu tin di haber cu keda sin paga impuesto riba ingreso (dividendo y ingreso laboral).
E transaccion a keda concretisa den contacto estrecho cu Belastingdienst (DIMP).
E multa di mas di un miyon Florin ta consisti di pago di un suma di Afl. 400.000, y ademas e sospechoso a renuncia varios suma di placa cu Ministerio Publico a confisca durante e investigacion.
Tambe Ministerio Publico a impone riba R.J.H. un obligacion di pago di Afl. 456.685 pa confiscacion di ganashi ilegal.
E suma aki ta cubri solamente un parti di e daño fiscal cu pais Aruba a sufri; DIMP lo trata cu e resto.
E suma total cu sospechoso tin cu paga na pais Aruba ta yega na Afl. 1.457.165.
R.J.H. por paga esaki den parti, conforme e acuerdo cu Ministerio Publico a cera cu ne.
Ministerio Publico ta considera cu tin prueba suficiente contra e sospechoso, kende, door di accepta e transaccion, ta reconoce di a comete delitonan fiscal.
Ministerio Publico ta haya cu e transaccion aki ta e forma mas apropia pa finalisa e caso penal y a tene na cuenta cu delitonan fiscal, en principio, ta apto pa un sancion financiero.
Dor di cera un transaccion, ta yega na un solucion mas rapido y mas eficiente.
Esaki ta na beneficio di Pais Aruba, di Ministerio Publico y di e sospechoso mes.
Ministerio Publico ta sigui comprometi cu e lucha contra criminalidad financiero y contra criminalidad cu ta afecta stabilidad di Pais Aruba (ondermijnend).
