Awe mainta Hues a keda asombra cu e homber H.R. (Flint) (57), sospechoso di intento di mata y maltrato severo, no a presenta den Corte. Hues kier pa H.R. ta para su dilanti pa e caso, mirando cu H.R. ta un conoci di Polis y e tin un condena caba pa a mata hende. Abogado mr. Mohamed a bisa Hues cu e no a haya H.R. pa papia cun’e pasobra H.R. no tin un lugar fiho pa biba.
SOLO DI PUEBLO por a compronde cu Hues a reclama Fiscal con por ta posibel cu Fiscal a laga e sospechoso bay liber for KIA, sin cu Hues a dicidi esaki. Hues ta haya cu no ta sigui e procedura legal manera ta para den ley.
ACUSACION
Fiscal a bisa Hues pa trata e caso sin cu H.R. ta presente. E acusacion cu Fiscal a presente contra H.R. ta cu riba 24 Juni 2024, el a purba mata un homber y subsidiario e ta wordo acusa di maltrato pisa. Ta asina cu H.R. lo a hinca un homber cu cuchiu.
HUES A RECLAMA FISCAL
Hues a remarca na Fiscal, con por ta posibel cu H.R. ta liber. Ta asina cu H.R. ta un conoci di Polis cu un carchi di castigo largo y hasta tin un condena pa a mata hende den pasado.
Fiscal a bisa Hues cu esey ta un procedura cu ta siguiendo na KIA. Hues a remarca cu con por ta posibel cu Fiscal a laga H.R. liber sin cu Hues a ordena esey. Hues a mustra cu segun e ley Penal nobo, Fiscal por pidi pa laga un sospechoso liber pero ta Hues ta dicidi si e sospechoso ta bay liber of no. Sin cu Hues a tuma un decision, a laga H.R. liber y awor e no ta presente den Corte pa para responsabel pa loke el a haci.
ORDEN DI DETENCION DI SOSPECHOSO
Hues a bisa cu e ta haya cu e caso aki ta serio y mirando H.R. su carchi di castigo largo, lo ta mihor pospone e caso. Hues a bisa cu den e caso aki e lo pidi Polis pa busca H.R., detene, pa asina trece H.R. Corte pa tratamento di e caso.
Hues a dicidi cu ta pospone e caso pa 23 October 2025. Hues a duna orden di detencion di H.R. y hiba H.R. Corte.
