Dos estimado mama cu nos semper lo recorda tabata e centro y curason di un evento cu a tuma luga diaranson anochi na Santa Cruz, Marie & Ties, ambos no ta cu nos mas pero nan ta ketobay sigui inspira nos semper den loke ta servicio na comunidad.
Un gran cantidad di hende a bini hunto pa loke tabata e ceremonia y apertura di CasMarie na Mama Ties, na unda cu un hogar familiar a keda transforma den un facilidad diseña pa sostene esnan cu ta sufri di dementia. E discursonan di dedicacion pa medio di miembronan di famia Fito Croes y Yvonne Escalona, como tambe e testimonionan audio visual conmovedor a yena tur hende nan wowo cu lagrima di gratitud p’e hende muhenan cu a move generacionnan pa haci bon den comunidad.
Mama Ties, famia di Croes-Lee a lanta un network di yiunan empresario y persistente cu a extende nan miembronan di famia, sostene nan cu hopi amor y inclusion incondicional, siñandonan respet y responsabilidad mutuo. Durante e añanan, e famia a enfrenta varios dificultadnan y momentonan dificil culminando na 2022 cu perdida di un ser keri, Mayrin, sigur un soldat den e lucha contra cancer.
Mama Ties a lanta e muchanan hopi consciente socialmente sigurando cu nan primiti di semper duna bek na comunidad pa medio di gratitud y humildad pa nan oportunidadnan. Riba 22 di december 2022, e rumannan a lansa Mama Ties Foundation dedica na expande y engrandece cuido di salud mental na Aruba. Mayrin a hunga un rol crucial den establece e fundacion mientras cu Fito a traha incansablemente pa transforma e hogar di nan estimado mama den un centro di cuido pa adultonan mayor, asina honrando e di e forma aki. Mama Ties Foundation a completamente encarga su mes den financia e renobacion y brinda e facilidad na CasMarie.
CasMarie na Mama Ties tabata prepara pa yama bon bini na 14 individuo pa interacionnan diario. Cu sosten di Minister di Asuntonan di Adulto Msyor, e iniciativa aki ta promove e concepto di Pasa Dia pa brinda alivio na famianan y cuido na adultonan mayor sufriendo di perdida di memoria of otro limitacionnan cognitivo. CasMarie tabata e socio perfecto pa e iniciativa aki. E colaboracion entre dos fundacion lo yuda comunidad enormemente. E dos organisacionnan non-profit tin un historia similar.
Marie, e estimado casa di Boy Escalone a cuminsa sufri di Alzheimer den su edad di 50 bay ariba. Su casa a dicidi pa no laga e amor di su bida atras anto a pesar cu no tabata tin mucho conocemento ainda riba e enfermedad e tempo ey, el a apoya Marie cu hopi amor y dedicacion te na momento di su morto. Despues cu el a fayece, Boy a cuminsa dedica su bida na yuda otronan, guiando miembronan di famia cu ta pasa den situacionnan similar. Su esfuersonan, den colaboracion cu e yiu muhenan awor adultonan, Yvonne, Dyane y Gisele, a resulta den e apertura di CasMarie, casi dos decada despues, na Savaneta.
CasMarie ta invita esnan cu ta sufri di dementia pa bin haci ehercisio, socialisa, y pasa tempo cu otro durante e dia mientras cu nan famia ta na trabao. Nan ta curasha pa haci loke ta trece nan alegria, cushina, arte, ehercisio, baila, puzzle, anto interaccion cu un staff cu hopi bon training, alegre y cu un curason hopi grandi.
