ORANJESTAD – Diamars mainta, Formador Evelyn Wever-Croes, a sigui reuni cu varios instancia. A toca turno na Fundacion pa nos Comunidad.
Segun Sra. Hart di dicho fundacion FPNC, e cantidad di personanan cu tabata wordo yuda dor di Rode Kruis cu voedsel pakket a baha, y esaki ta debi cu varios persona no ta na Aruba mas. Varios a regresa nan pais cu vuelo humanitario, otro personanan tambe a yama “danki” pa e ayudo, pero no mester mas, pasobra nan a cuminza traha bek.
Esaki ta haci cu Fundacion pa Nos Comunidad cu a tuma over e budget di Rode Kruis, tin espacio pa asina por sigui traha y suministra tur esnan cu ta den necesidad di cuminda.
A pone varios persona riba blacklist cu tabata mal usa e-voucher di Rode Kruis
Sra. Hart di Fundacion pa nos comunidad tambe a informa diamars mainta, cu durante un control cu nan fundacion a haci riba e e-voucernan di Rode Kruis, nan a bin descubri irregularidad cu tabata sosode.
Tabatin personan cu tabata cana cu e vouchernan aki, cual no tabata riba nan nomber. Tambe a haya voucher di hende cu ya a bandona Aruba. Nan tambe a tuma nota di informacionnan cu ta bisa cu tin hende tabata bende nan e-voucher. Fundacion pa nos Comunidad a check tur esakinan y nan a pone un stop mesora y es personanan cu nan a haya ta haci e practicanan aki, a wordo poni riba blacklist.
