WILLEMSTAD – Después di más ku un aña, Stanley Clementina ta bèk ku su propio produkshon titula ‘Mi No Por Lubidá Bo’, huntu ku e kantante hóben Kevv. Stanley su wowo semper ta riba talento nobo i ora ela haña e oportunidat pa traha ku Kevv, nase komo Kerven Dammers, ela aserk’e pa kolaborá riba e dushi kompa akí.
Kevv su amor pa músika a kuminsá for di un edat yòn, pero ta na momentu ku ela imigrá pa Hulanda, ela pone su meta pa bira un artista i produktor. Kevv ta un artista outodidakto, unda ela siña su mes toka bass i guitara i tambe a kuminsá train su kantamentu. Tambe e hóben talentoso a siña su mes tur loke e sa di kanto, produkshon, ‘mixing & master’ vía di YouTube. Stanley no por a pasa e oportunidat di traha ku Kevv, paso e ta kere den duna bèk na hubentut. Akí, e generashon benidero ku Kevv ta representa, ta topa ku e generashon aktual, representa pa Stanley, unda ambos ta keda inspira pa otro.
‘Mi No Por Lubidá Bo’
Stanley su ultimo produkshon propio tabata ‘Quarantaine’ na mei 2020 ku su banda CShaw, pero nos no por lubidá e infeksioso kompa ‘Kompronde’ i e bunita piesa ‘No Trata Mi Asina’. ‘Mi No Por Lubidá Bo’ ta papia di un konekshon intenso ku e protagonistanan tin ku e damanan figurando den e videoclip, kende a laga un impreshon inolvidabel. E videoclip a keda graba riba e isla hulandes di Texel i a keda skibí, areglá i komposita pa Stanley Clementina.
Pionero di kompa na papiamentu
Stanley ta konosí pa su kolaborashonnan ku diferente artista den e genero di Afro Beat, i alabes ta keda konsiderá un pionero den kompa na papiamentu, ku aktualmente ta hopi popular bou di bandanan lokal. Stanley ta kontentu di por ta un inspirashon pa bandanan di Kòrsou, Aruba i Boneiru eksplora otro género banda di ritmo kombiná, kua també tin su orígen den kompa. Un par di luna pasa, Stanley tabatin dos ‘release’ ku e banda K’Ribe. Ta trata di ‘Kòrsou ta dushi’ unda Stanley tabata e vokalista i tambe ‘Deep Down’, ku Stanley a produsí i tambe a kanta ku John Francis.
Durante e temporada di ‘lockdown’ na Hulanda, Stanley tabata hopi den studio ku artistanan hulandes konosí manera Ronny Flex i Jonna Fraser. Resientemente ela asta gana un ‘Gouden Award’ ku Frenna pa su kantika ‘Ghetto Youth’, ku a haña mas ku 8.6 mion streams. Pero nunka Stanley ta lubidá su isla i ta bèk trahando riba su mes produkshonnan.
Pa más informashon riba Stanley su futuro produkshon i presentashon, por akudí na e página sosial di Stanley Clementina na Facebook.com/stanley.clementina i Instagram @stanleyclementina.
Bo por gosá di ‘Mi no por Lubidá Bo’ ku Kevv. riba You Tube:
