ORANJESTAD, Aruba 22 di October 2021: Un fundacion cu curason ta consisti di trahado cu tin pasion pa nan trabou. Trahado cu ta yena cu energia y ta inspira otro. Cu ta dedica na nan trabou y e clientenan. Awe e fundacion kier presenta 3 persona cu pasion pa nan trabou y cu amplio experiencia, cu kier comparti kico e trabou ta significa pa nan, pa e calidad di cuido di e cliente y con comunidad di Aruba por aporta.
Jurybeth Kock-Rijke ta traha como koki na Stichting Ambiente Feliz desde 4 di januari 2015.
Kico e trabou di koki ta significa pa bo na Ambiente Feliz?
“E trabou di koki na Ambiente Feliz ta significa pami, sin mucho palabra, un manera di expresa mi amor pa mi clientenan riba un tayo den forma di un cuminda cu ta haci mi clientenan contento.
Tur mainta na momento cu mi ta sirbi e desayuno, manera nan scucha e zonido di e garoshi, nan sa cu nan ta bay come. Nan manera di expresa nan mes ora nan wak mi pasa cu e garoshi ta yena mi curason cu alegria y ta pone mi corda kico ta e proposito di mi funcion. Cu un grito di alegria y cu un caluroso bon dia mi ta cuminsa mi dia di trabou na Ambiente Feliz”.
Con abo, den bo funcion, ta yuda duna contenido na calidad di cuido?
“Mi ta kere cu mi funcion ta hunga un parti hopi importante den e bida di cada cliente. Cada cliente ta diferente y cada uno tin su reto. Mi meta ta pa cada cliente ricibi nan cuminda personalisa a base di su necesidad na bienestar di su salud”.
Con abo ta wak e cuido pa persona cu limitacion intelectual na Aruba y con comunidad por aporta na esaki?
“Mi lo djis bisa esaki. Duna persona cu limitacion intelectual un chens y bo lo keda sorprendi di e capacidad cu e personanan aki tin. Nan ta personanan cu por hopi, pero hopi biaha no ta ricibi e oportunidad pa participa, socialisa of otro. Tin esnan cu ainda ta wordo poni un banda pasobra nan tin un limitacion. Esaki ta algo di lamenta. Aruba, ban duna e persona cu limitacion intelectual mas atencion y mas oportunidad. Nos por!”.
Mathilda Werleman ta traha como huishoudelijk medewerker desde 1 di mei 1996 Ambiente Feliz.
Kico e trabou di huishoudelijk medewerker ta significa pa bo na Ambiente Feliz?
“Pa mi un cas semper mester ta limpi. Particularmente ora bo ta traha cu persona cu ta rekeri cuido y guia. Ta importante pa preveni contagio di malesa. Un bon higiena ta promove un bon salud. Mi tin mas cu 25 aña ta eherce mi trabou cu hopi gusto. E trabou a siña mi hopi. No solamente ariba e tereno di limpiesa, pero tambe con pa guia e clientenan y traha den un team”.
Con abo, den bo funcion, ta yuda duna contenido na calidad di cuido?
“Como profesional mi ta aporta na e bienestar di cada un cliente. Calidad di cuido ta bay man den man cu higiena. Mi ta forma parti di un team cu ta traha duro tur dia pa crea un ambiente feliz den cas. Na momento cu un persona bishita Ambiente Feliz na Santa Cruz e ta duna mi un satisfaccion di mira un sonrisa ariba e cara di e otro persona pasobra e cas ta limpi. Esey ta yena mi cu felicidad y ta un reconocemento di e importancia di mi trabou”.
Con abo ta wak e cuido pa persona cu limitacion mental na Aruba y con comunidad por aporta na esaki?
“Mi ta sinti cu na Aruba ainda tin un tabu grandi pa locual ta persona cu limitacion. Ami ta considera tur persona cu limitacion como un ser humano cu tambe tin derecho di participa. Comunidad mester habri nan curason pa nan. Acepta cu nan tambe por forma parti di nos comunidad. Nan por hopi mas di locual nos ta pensa. Ban duna nan un oportunidad pa desaroya y participa”.
![](https://solodipueblo.com/wp-content/uploads/2021/10/Lorena-rotated.jpg)
Lorena Lampe ta traha como woonbegeleider desde 1 December 1996 na Stichting Ambiente Feliz.
Kico e trabou di woonbegeleider ta significa pa bo na Ambiente Feliz?
“Den mi trabou como woonbegeleider mi a siña kico e ta significa pa traha cu persona cu limitacion intelectual. Mi a siña con pa reconoce nan necesidad y traha hunto ariba e bienestar di e cliente. Mi a siña cu no tur hende ta comunica igual y ta importante pa tuma tempo pa scucha otro. Mi a logra crea un relacion duradero cu e clientenan basa ariba confiansa y respet pa otro. Esaki ta facilita mi persona pa duna un bon guia y traha ariba mehoracion di nan calidad di bida”.
Con abo, den bo funcion, ta yuda duna contenido na e calidad di cuido?
“Na prome lugar mi ta acepta cada cliente manera nan ta. Cada un cliente ta unico. Mi ta respeta nan derecho como ser humano y mi ta percura pa nan cuido ta adecua. Nos ta enfoca ariba un bon cuido medico y bon alimentacion. Nos ta organisa tambe varios actividad na unda nos clientenan por pasa momentonan agradabel. E clientenan ta gusta pinta, traha obra di man, baila y canta y mucho mas. E dianan di fiesta semper ta wordo celebra na grandi”.
Con a bo ta wak e cuido pa persona cu limitacion mental na Aruba y con comunidad por aporta na esaki?
“E cuido pa cu personanan cu limitacion intelectual na Aruba ta basta bon, pero e por ta miho. Na Aruba no tin suficiente instancia pa brinda cuido na persona cu limitacion. E lista di espera ta hopi largo y tin biaha no tin e cuido rekeri tampoco. E subsidio cu un fundacion manera Ambiente Feliz ta ricibi no ta suficiente. Pa por realisa mantencion, cierto actividad of otro e fundacion ta depende di donacion. Gobierno y comunidad di Aruba mester ta consciente cu “Hey, nan tambe tey”. Si tur hende duna un man, sea por medio di un donacion, trabou boluntario of otro, nos por logra hopi y realisa un mihor cuido pa esnan mas vulnerabel den nos comunidad”.