Diahuebs awo, 13 di maart 2025 un publico consistiendo di invitadonan lo ta testigo di un documentario unico titula “The Prime Ministers”.
Pa mas cu un aña y cu produccion di Kenwolff studios, Stichting Klein Aruba hunto cu sr. Omar Harms a bin ta traha y forma e documentario aki cu lo dura 1 ora y 15 minut.
The Prime Ministers ta un pelicula cu lo explora e bida humano, banda di esun politico, di Aruba su cuater Prome Ministernan desde 1986, Henny Eman d.f.m., Nelson Oduber, Mike Eman y Evelyna Wever Croes. E famia y amigonan di cada un di nan tin e honor di presencia e produccion.
Stichting Klein Aruba cu Addonsito Croes como secretario, a uni na e idea di e creado Omar Harms y hunto cu Jeng Leong, Kencho Wolf y Erin Croes, a crea e documentario unico aki, reuniendo Aruba su 4 prome Ministernan.
For di awo caba e productornan ta yama danki na cada cas comercial y instancia cu compronde, kere den e idea haciendo e documentario aki posibel. Sigur pa hobennan cu tin e materia Historia y Staatsinrichting, e documentario aki ta masha educativo.
Pueblo di Aruba lo tin e oportunidad di mira e documentario aki dentro di poco. Luga, dia y ora lo keda anuncia. Mas informacion por ta haya riba e instagram page: Theprimeministersaruba.
