Stichting Rancho ta negativo y mentiroso!!  

* Ningun momento lo cera caminda ni acceso pa piscadornan na Waf di Rancho

// Stichting Rancho mes a bay di acuerdo cu embeyecimento y diripiente kier cambia di opinion 

E siman aki por a scucha for di presidente di Stichting Rancho, Sr. Clifford Rosa, cu e no ta contento mas cu e acuerdo cu e mes a cera pa cu embeyecimento di Waf di Rancho. 

Den un entrevista den prensa,  Sr. Clifford a saca su gal riba e desaroyo pa embeyece e area di waf di Rancho y a trece un cantidad di alegacion dilanti, cu ta carece di tur base. 

SOLO DI PUEBLO a bay investiga poco mas profundo den e caso aki, y nos a bin haya claridad,  cu tur loke cu Sr. Clifford a trece dilanti, ta basa riba mentira y hasta riba insitagacion. 

Algun di su ponencianan ta cu lo bay cera caminda pa piscadronan y kita acceso. Esaki no ta basa riba berdad,  envista cu den e plan cu Sr. Clifford mes a acorda, e sa masha bon, cu a keda palabra cu lo no kita e caminda cu ta yega na e pier ni tampoco acesso. 

Enberdad e desaroyador di e compleho di condominio kier embeyece e area dilanti su propiedad y esaki via un boardwalk, pues un loop pad cu ta pasa dilanti e propiedad mas na banda pazuid.   E banda panoord unda ta situa e waf di Rancho lo mantene su caminda, unda tur piscador por yega,  acceso liber,  sin ningun “hefboom” ni ningun otro obstaculo. 

Obviamente nos por sinti cu Sr. Clifford Rosa lo kier lanta su bandera politico y cuminza causa un drama,  sin ningun hustificacion. 

Mas peor ta cu e kier instiga cu informacion robes, indicando cu lo kita caminda y piscadornan no por yega mas waf di rancho. 

Ta yega ora pa Arubiano stop di bringa desaroyo positivo.  Si bay wak e sitio awendia,  con mahos e ta,   nos mester ta contento cu tin inversionista cu dentro di Pandemia,  ainda ta sigui inverti nan placa pa haci di un ruina, algo bunita. 

E ponencia di Sr. Clifford Rosa, cu e kier pone tur trabao abao,  y e kier bay discuti riba “Port City”, cual ta un otro proyecto na full un otro sitio, no tin ningun sorto di logica.   Kico e projecto aki di Wesstraat/Schoenhaven tin di haber cu Port City? 

Den SOLO DI PUEBLO,  di 11 di December 2020,  APA a informa cu a yega na un acuerdo cu Stichting Rancho.   Den e reciente entrevista tambe Sr. Clifford ta confirma cu e tin un acuerdo!   Ta kico a cambia anto?   Instigacion politico? 
of ta kico e ta anto? 

Segun SOLO DI PUEBLO a bin compronde den e comunicado di 11 di December,  te hasta e inversionista lo pone casi 100 mil florin pa asina traha facilidadnan pa e piscadornan,  manera baño y coneccion di awa,  algo cu actualmente nan no tin. 

Resumiendo nos ta kere cu Sr. Clifford mester ta mas sincero cu su mes y cu su piscadornan.  E mester stop di hunga wega y admiti cu e mes a acorda e plannan. E mester admiti cu lo no cera caminda.  E mester admiti cu lo no cera acceso. 

Cu e siman aki a pone un baricada,  tabata netamente pa haci trabaonan di construccion, unda a lanta klinkernan bieuw pa asina prepara e sitio pa traha algo mucho mas bunita.   

Dialuna SOLO DI PUEBLO lo sigui elabora mas riba e tema aki.

LEAVE A REPLY

Please enter your comment!
Please enter your name here