E gloria cu bo a duna Mi, Mi a duna nan,pa nan ta un, mescos cu nos ta un. Ami den nan y Abo den Mi,pa nan por ta perfecto den unidad, pa mundo por sa cu Abo a manda Mi y cu bo a stimanan, mescos cu Bo a stima Mi. (Juan 17:22-23).
Stima Señor bo Dios cu henter bo curason,y cu henter bo alma,y cu henter bo mente,stima bo prohimo manera bo mes.( Mateo 22:37-39).
Hopi cos ta pone nos wowo habri y wak si tin amor berdadero of ta hacimento di wega tin.
Ora un mayor sa masha bon cu su yiu ta haci malo y e ta sconde e maldad e mayor ey no stima su yiu.
Un mayor no por apoya e yiu cu e ta stima den ningun clase di inmoralidad y maldad, pasobra esey ta hiba e yiu na rechaso di Dios y si e no arepenti e ta riba caminda pa fierno.
Den cada rebeldia cu un mayor coopera cu nan yiu, diabel ta cohe ventaha den e hoben su bida.
Wak kico a sosode den bida di Jacob ora Rebecca su mama a coopera cune pa gaña su tata Isaac y asina horta bendicion di su ruman Esau.( Genesis 27:11-13).
Si bo ta stima bo prohimo, bo no ta gosa ora e ta den afliccion, ni tampoco desea malo, of bisa locual bo a sembra bo ta cosecha, pero simplemente bo ta haci oracion pe, y yuda caminda bo por dune un man pa sali pa dilanti.
Ta para scirbi den Galationan 6:1-3 Rumannan hasta si un hende wordo sorprendi, den caulkier delito, boso cu ta spiritual restora un hende asina den un spirito di mansedumbre, cada un wak su mes, pa boso tambe no wordo tenta.
E wega di Fariseo y Publicano tin di caba, e asunto di “ami si no ta manera tal persona” ta un chiste of un dicho orguyoso, pasobra nos tur ta vulnerabel pasobra ta Dios ta cuida nos tur.(Lucas 18:9-14).
Manera esnan cu a wordo scohi di Dios, santo y stima, bisti un curason di compasion, cariño , humildad,mansedumbre y pasenshi, Y boso soporta otro y pordona otro, si un di boso tin un keho contra un , mescos cu Dios a pordona boso, asina boso tambe mester haci.(Colosensenan 3:12-14).
Ta un wega masha sushi, ora nos ta husa dolor di nos prohimo como nos fuente di alegria, e topico principal di nos combersacion.
Tin hende hasta ta hiba gusto ora un otro persona bira malo, sin lubida cu pa bo desea malo pa un persona, bo curason mes ta malo.
Ma Dios a demostra Su mes amor pa cu nos den esaki, cu tempo nos tabata pecador ainda, Cristo a muri pa nos.( Romanonan 5:8).
Cristo Hesus a muri pa nos tur, pa pordon di pica di nos tur, esun cu kere den dj’E lo ta salba y esun cu no kere lo ta condena.
Dios ta amor y esun cu ta permanece den amor, ta permanece den Dios,y Dios ta permanece den dje,
(1 Juan 4:16).
Ora un hende ta bisa e ta odia un persona, hopi biaha e palabra ta di rabia y emocion, pasobra tur hende mester sa kico e palabra di Dios ta bisa den 1 Juan 3:14-15 ;Esun cu no ta stima ta permanece den morto. Ken cu odia su ruman ta un matador, y boso sa cu ningun matado no tin bida eterno ta permanece den dje.
Nos ta yama pa stima nos prohimo y saca un man yuda,
Sinceramente , Pastor Marcel Balootje
