Durante e prestigioso CARIFTA Swimming Championships 2026, Stingray Swimming Team a confirma un biaha mas su posicion como un plataforma di desaroyo di talento di nivel halto den Caribe. E competencia aki, esun mas grandi y elite pa e landadonan hubenil (11–18 aña), ta reuni e mihornan di region Caribe, unda solamente e Top 8 ta avansa pa final anochi. Den e escenario exigente aki, cinco atleta di Stingray a entrega prestacion sobresaliente, logrando medaya, finalista y un cantidad di mehoracion di tempo (Personal Bests/PB’s), representando Aruba y Stingray Swimming Team cu orguyo y excelencia. Un competencia internacional cu a conta cu 19 pais y alrededor di 500 landador.
Un team di 5 landador di nivel
E siguiente 5 atletanan di Stingray Swimming Team a demostra un nivel excepcional durante CARIFTA 2026. Cada prestacion ta refleha disciplina, determinacion y e capacidad pa competi cu e mihor talentonan hubenil di Caribe.
Leandro Santiesteban (13): Leandro a lidera cu un campeonato impresionante den su 8 eventonan: 2 medaya di plata (50m & 100m Breaststroke) y 1 di brons (200m Breaststroke), tur cu PB’s. El a logra tambe di 5 lugar den 50m Butterfly (PB).
Den relays: 800m Free Relay (PB) y 400m Free Relay (PB) unda ambos a gana medaya di plata, hunto cu un 50m split (PB) fuerte. Su reaccion- y terminacionnan a destaca consistentemente.
D-Leylah Gerrel (14): D-Leylah a mustra consistencia y forza competitivo den su 9 eventonan, logrando 2 final den Top 8 den 200m free y 200m back y 4 PB’s. Den relay 400m Free a logra medaya di plata y PB y den 200m Free, nan a keda net na di 4 lugar. D-Leylah a contribui na un resultado fuerte pa Team Aruba.
Emma Ponson (12): Den su prome CARIFTA, Emma a entrega prestacion solido den su 9 eventonan cu 4 PB’s: 100m Butterfly (PB, Top 10), 200m Butterfly (PB den prelims y final, di 7 lugar), 200m Free, 50m Fly, demostrando un progreso notabel y consistente.
Den relay su participacion activo den e ekipo 11–12, el a gana experiencia balioso na nivel internacional.
Vitali Inocencia (12): Vitali a destaca den su 9 eventonan, cu un prestacion fuerte den 200m Breaststroke, unda el a termina di 4 lugar cu un PB y hopi cerca di subi podium. Su otro eventonan: 100m breaststroke di 5 lugar, 100m Free di 6 lugar, 400 IM di 7 lugar 200m Free di 8, ta un muestra di su calidad pa ta posiciona den e top 8 di Caribe, sin laga afor su participacion den relay. Su actitud competitivo a mustra determinacion y potencial pa futuro.
Richmyra Hoen (11): Pa su prome experiencia na CARIFTA, Richmyra a mustra corahe y compromiso den su eventonan, participando y ganando experiencia importante riba escenario internacional. Den relay el a forma parti di e ekipo 11–12, contribuyendo na e esfuerzo colectivo di Aruba y ganando experiencia pa futuro.
Orguyo di Stingray
E prestacion di e cinco atletanan aki ta refleha e esencia di Stingray: disciplina, perseverancia y excelencia. Henter e famia di Stingray Swimming ta orguyoso, specialmente e coachnan Ismael Santiesteban, Valerie Eman, Paolo Inocencia y Shameeza van Loon. E futuro di landamento na Aruba ta den bon man.
