Rebeldia ta pica, rebeldia no ta bini di Dios, rebeldia ta pone hende pasa berguensa, tur porta ta sera pa hende rebelde, tanto porta spiritual, como oportunidad den bida, no ta hende ta sera porta pa bo , pero ta bo actitud rebelde ta danja tur bo tur relacionnan.
Hopi hende ta pensa cu rebeldia ta cos di broma cune, pasobra den nan mes creencia, nan ta pensa cu nan ta fuerte of sabi y cu ningun hende no por domina nan, pero otro banda nan ta demostra di ta bobo y cu falta di comprondemento.
Hende rebelde ta pensa cu nan ta haci otro hende danjo, pero nan final nan ta bin ripara cu ta nan mes nan ta haci danjo, y ta nan mes nan ta perhudica y nan mes lo keda decepciona.
Cada hoben cu no kier tende di su mayornan,
Cada hende homber cu no ta respeta su hogar y su famia,
Cada chauffeur cu ta corre auto burachi,
Cada hoben cu ta corre brommer irresponsabel,
Cada persona cu ta papia palabra sushi y baho no ta importa den cual idioma, ta un senjal di rebeldia contra Dios, y contra ley estableci den e pais.
Cada biaha cu nos sa masha bon, cu nos ta for di boluntad di Dios, y nos ta haci bofon di Dios, keriendo cu ta hende nos kier impresiona, caba ta contra Dios nos ta rebeldia, ora nos sa masha bon cu algo ta pica, y nos ta pretende cu nos ta mas sabi cu Dios, y sigi haci maldad y comete inmoralidad, y abominacion concientemente nos ta den e cueba di scuridad di rebeldia, caminda nos ta duna diabel goso den nos bida.
Rebeldia ta mescos cu bruheria, bo ta kere den dje, pero na final lo bo mira cu no tin satisfaccion pasobra Dios no ta den e asunto, ta bo so cu bo so, y ta spiritonan malo bo ta alimenta den bo bida.
Rebeldia ta pone hende tira gran oportunidad den nan bida afo: Pasobra rebeldia ta manera e pica di bruheria,y capricho ta manera inikidad y idolatria,pasobra bo a rechasa,e Palabra di Senjor E tambe a rechasa bo como rey .(1 Samuel 15:23).
Tene bon cuenta cu hende cu ta duna bo conseho contra palabra di Dios, no ta bon consehero ni tampoco nan merece bo amistad, pasobra conseho contra palabra di Dios, cu ta mustra cu bo ta busca bo propio interes solamente y bo no ta wak interes di otro ta conseho vano y bobo.
No ta pornada ta para scirbi den Romanonan 2:5:Ma pa motibo di bo capricho, y bo curason cu no ta repenti bo ta montona furia pa bo mes den e dia di furia, y revelacion di e huicio husto di Dios. Kende lo paga cada ken segun su obranan.
Proverbionan 17:11 ta bisa: Un hende rebelde ta busca solamente maldad, pesey un mensahero cruel lo wordo manda contra dje.
Isaias 1;19-20 ta bisa lo siguiente; Si boso ta dispuesto y ta obedece, boso lo come e miho di e tera,ma si boso nenga y rebeldia, spada lo devora boso. Di berdad e boca di Senjor a papia.
Cuanto hoben y hende grandi no ta perdiendo nan bida diariamente pa motibo di desobediencia na Senjor,
Cuanto famia no ta kibra pa motibo di desobedencia na Senjor,
Cuanto hoben no ta sera, pa motibo di desobedencia na Senjor y nan mayornan.
Ora un hende ta rebelde contra Dios, e ta rebelde contra su mes, y tur hende sa cu den rebeldia no tin beneficio.
Sinceramente Pastor Marcel Balootje
