Kehamento ta algo hopi laf, tin hende tur fin di luna nan ta keha, of ora nan no por haci locual cu nan kier nan ta keha, muchanan malcria ta keha, hende grandi orguyoso y arogante ta keha, y hopi biaha gratitud ta wordo lubida, pero kehamento no ta cos di awe, no lubida cuanto cos bon Dios tabata haci pa e Israelitanan den desierto, pero toch nan tabata keha y murmura, manera hende cu no a ricibi nada di Dios.
Awel e spirito di kehamento ey ta un spirito complica cu hopi biaha ta demostra cu hende no sa kico e kier, y ta duda hopi, y ta pesey e enemigo ta probecha di dje.
Palabra di Dios ta bisa den Filipensenan 2 :14-16 : Haci tur cos sin murmura,ni discuti,pa boso por proba boso mes di ta sin culpa y inocente,yuinan di Dios sin reproche,meymey di un generacion corumpi y perverso, entre cualnan boso ta briya,manera lusnan den mundo, teniendo duro na e palabra di bida.pa den e dia di Cristo,mi por tin motibo pa gloria,pasobra mi no a corre en bano,ni traha en bano.
Kehamento no ta trece crecemento, kehamento ta kita alegria, ta trece duda y ta mengua fe di hende,
Ta trece discucion, y ta trece division,y ta desmostra cu e hende no ta stabiel, cu cualkier distraicion, ya a cambia su pensamento.
Enemigo ta gusta ora hende ta keha especialmente contra Dios, esey ta nifica un falta di respet pasobra ta di Dios nos ta ricibi tur cos.
Kehamento no ta agrada Dios.
E ta desmostra falta di gratitud.
E ta baha bo luz.
E ta causa division.
Hala serca Dios y e lo hala serca boso, limpia boso mannan , boso pecadornan,y purifica boso curason, boso di curason dobbel.( Santiago 4:8).
Hopi kehamento ta trece amargura den bida di hende, un matrimonio cu constantemente tin kehamento, ta mata e amor, ta kibra e relacion , ta discuti constantemente, y no tin pas.
Sea gradicido den tur cos,pasobra esaki ta e boluntad di Dios, pa boso den Cristo Hesus.(1 Thesalonisensenan 5:18).
Purba di complace tur momento cu un mucha, ta algo peligroso, pasobra mester sinja e mucha cu e tin di warda ora su mayornan ta alcansa y no keha pasobra su mayornan ta depende di Dios, y Dios no ta gusta kehamento.
Ora nos ta biba den gratitud,nos ta demostra fieldad y confiansa den nos Dios, ta mustra amor, fe y perserverancia.
Kehamento ta stroba nos di mira locual Dios tin pa nos, pasobra kehamento ta trece scuridad den bida di hende, por ehempel si un cunukero ta keha, ora tera ta seco, ora awa cay hopi, ora e tera ta mucho lodo, e cunukero ey no ta planta, pasobra su duda ta trece flohera den su bida.
Un hende cu ta keha hopi ta demostra falta di fe, y tin hopi chens di manipula otro hende, pasobra e kier mira tur cos wordo haci pe, sin haci ningun esfuerso di su banda. Kehamento di berdad ta stroba hende di bay dilanti.
Ta tempo pa cambia kehamento den alabansa,pasobra alabansa ta trece bendicion, ta aumenta nos contacto cu Dios, ta alimenta nos alma, ta trece bida den nos spirito, ta cambia nos pensamento, y ta hiba nos bida na un nivel di libertad,
Mientras cu kehamento ta mantene hende preso, duda ta debilita curason di hende, pasobra un curason cu ta duda, no por sirbi Dios.
Pone tur kehamento un banda, y para firme pasobra Dios kier haci cos grandi den bo bida.
Yena bo curason cu fe, alabansa y gratitud.
Sinceramente , Pastor Marcel Balootje
