Desde algun aña caba, Fundacion Contra Violencia Relacional ta organizando “Orange Aruba” cu ta un campaña internacional contra violencia contra Hende Muhe y Mucha Muhenan. E campaña ta cuminsa dia 25 di november y ta caba dia 10 di december. Ta remarcabel e cantidad di noticia cu ta cubri maltrato riba nos isla. Hopi di e casonan ta keda scondi. Pesei ta importante pa nos keda conscientisa tur hende di e casonan aki pa por denuncia na tempo pa por salba esnan den e situación prome cu ta laat.
E aña aki ta observa e Orange Aruba cu un presentación di un película cu ta relata un aconticimento den un famia den pasado cu a marca historia pa con nos ta anda cu violencia. FCVR a involvi partnernan c uta traha riba tereno social tambe pa join den nan esfuersonan. Esakinan ta: CEDEHM, HIAS, UNHCR y OIM. Aña pasa debi na Covid 19 a tene un conferencia cybernetico na unda varios profesional y abogadonan di derechonan humano a duna nan bista riba varios punto importante.
Nos no mester tapa wowo, orea, ni muchu menos boca y huy e problema aki. E pensamento cu “no ta mi asunto, ta nan problema”, ta completamente robes. Tristo pa nos sigui duna lus berde pa keda pensa asina. Un cambio di mentalidad ta den man di cada cuidadano cu di berdad stima su pais y su prohimo. Si nos no para keto den nos mes cas, aki un par di aña ta tur problema ta worde resolvi cu violencia. Nos no mester keda cuidadanonan tolerante mas !
Maltrato entre pareha hoben tambe ta aumenta. E mucha muhe of mucha homber cu ta experencia su “Puppylove”, ta pensa cu ta normal pa grita / ofende y hasta dal pasobra ora di pordona otro, nan ta sinti mas dushi.
Na FCVR ta haya cliente cu pa hopi aña ta den un circulo di violencia. Tur tipo di violencia : verbal, emocional, economico, menasa, intimidacion, fisico, seksual, acoso etc. Si nan tin yui, e mayornan aki ta manda e mensahe cu ta o.k. pa maltrata otro.
FCVR tey pa yuda e cliente aki pero ta hopi mas importante inverti den prevencion.
E team di FCVR ta manda un mensahe hopi cla pa 2021-2022: Ban caba cu violencia contra hende muhe y mucha muhe awor!!
Riba e potret: parti di e team di FCVR y parti di e publico presente na e lansamento di ORANGE Aruba 2021.
