Sindicato di Trahador den Telecomunicacion (STT) ta expresa publicamente su preocupacion serio tocante e vacatura pa e puesto di director nobo di SETAR N.V. E condicionnan cu ta menciona den e vacatura, especialmente e contrato di cinco aña y e posibilidad pa candidato di exterior, ta lanta basta pregunta cerca STT.
SETAR N.V. no ta solamente un compania di telecomunicacion. Ta un compania Arubiano cu tin un papel importante den economia di nos pais. SETAR ta duna trabou na hopi hende, tanto directamente como indirectamente, y su inversionnan den infrastructura y tecnologia ta contribui na desaroyo di Aruba. Pa esey, e futuro di SETAR no ta solamente un asunto di e compania mes, sino algo cu ta importante pa nos comunidad.
Durante e ultimo 23 aña, desde cu SETAR a bira SETAR N.V., nos a conta cu un director cu a sali di den SETAR mes. Durante e periodo aki, SETAR a sigui crece, inverti den tecnologia, enfrenta competencia y mantene su posicion den mercado di telecomunicacion. Esaki ta demostra cu liderazgo interno por funciona y cu den SETAR tin conocimiento y experiencia pa dirigi e compania.
Pa esey, STT ta keda cu e pregunta pakico awor ta necesario pa habri e porta asina amplio pa candidato di exterior, mientras cu nos propio profesionalnan Arubiano tin añanan di experiencia y conoce SETAR di paden.
Loke ta preocupa STT especialmente ta e contrato di cinco aña cu ta menciona den e vacatura. No mucho tempo pasa a logra cu e director actual por keda dos aña mas, precisamente pa mantene continuidad y estabilidad den SETAR. Awor nos ta mira cu ta contempla un contrato di cinco aña pa un director nobo, mientras cu SETAR ta cay bou di LNT.
Nos ta puntra nos mes pakico cinco aña ta necesario y con esaki ta cuadra cu e situacion actual di SETAR.
Otro punto cu ta lanta preocupacion ta cu den e vacatura ta menciona posibilidad pa candidato di exterior muda bin biba na Aruba, como tambe exigencianan relaciona cu permiso di trabou. Ademas, experiencia den telecomunicacion no ta aparece como un exigencia principal, mientras cu candidato cu experiencia den otro sector tambe por cualifica.
Pa STT, esaki ta lanta e pregunta si e condicionnan di e vacatura no ta habriendo e porta mas amplio pa candidato di exterior, mientras cu nos propio profesionalnan por termina den un posicion menos favorable.
STT no ta contra ningun candidato solamente pa motibo di su nacionalidad. Pero nos ta kere cu un compania manera SETAR, cu ta opera den un mercado competitivo y cu ta enfrenta cambionan tecnologico constante, mester duna gran importancia na conocimiento di telecomunicacion, experiencia y comprension di nos mercado local.
Nos no por lubida tampoco cu STT y su miembronan a lucha den pasado pa evita cu SETAR wordo bendi. E lucha ey tabata pa conserva SETAR como un compania di pueblo Arubiano. Ta e mesun compromiso ey cu ainda ta motiva STT pa para firme ora cu nos ta mira desaroyonan cu por afecta futuro di SETAR.
Tambe nos ta preocupa pa cu e relacion cu LNT. STT a expresa anteriormente su preocupacion tocante e efecto cu e ley aki por tin riba SETAR y su profesionalnan. Nos no lo considera aceptabel si eventualmente ta haci un excepcion pa facilita nombramento di un director di exterior, mientras cu nos propio profesionalnan Arubiano ta sigui bou di e limitacionnan di e mesun ley.
STT no lo keda sinta keto y mira con ta habri e porta pa candidato di exterior, sin cu nos propio profesionalnan haya e reconocemento y oportunidad cu nan merece.
Nos ta papia di un compania cu durante hopi aña a demostra su balor pa Aruba y cu su trahadonan a contribui diariamente na su desaroyo. E nombramento di un director nobo ta un decision cu lo tin consecuencia pa futuro di SETAR, su trahadonan y nos pais.
SETAR tin 23 aña cu a bira SETAR N.V., y durante e periodo aki nos a conta cu un director cu a sali di den SETAR mes. E experiencia aki a demostra cu nos propio profesionalnan tin e capacidad pa lidera SETAR. STT ta kere cu nos profecional nan interno merece e confianza y oportunidad pa sigui haci esaki.
Sindicato di Trahador den Telecomunicacion (STT)
