Dienst Uitvoering Onderwijs (DUO) ta bishitando e area Caribense di 9 te cu 27 di maart. Durante e bishita DUO lo habri oficinanan di servicio temporal y lo organisa encuentronan di informacion tocante financiamento di estudio. Ademas lo duna atencion tambe na e herment nobo di Gobierno Central cu ta yuda studiantenan prepara nan mes pa nan biahe pa Hulanda.
Anualmente mas di 1.500 hoben di e area Caribense ta cuminsa un estudio na Hulanda. Pa laga e transicion aki cana mas suave posibel, Duo, den colaboracion cu otro organisacionnan (gubernamental), na 2025 a desaroya un herment special online. A traves di rijksoverheid.nl/caribischestudenten studiantennan ta haya un resumen cu informacion tocante nan derechonan, cua asuntonan nan mester regla y unda nan por haya ayudo. Ademas tin un version disponibel na ingles a traves di government.nl/caribbeanstudents.
Tin bon experencia cu e herment. “Nos ta mira cu studiantenan Caribense y nan mayornan ta experencia e herment como sumamente balioso y cu studiantenan pa e motibo aki ta biaha miho prepara pa Hulanda”, segun Monique Hoogerwerf, coordinado pa e area Caribense na DUO. “Esey ta aporta na un bon comienso di nan estudio.”
Encuentronan di informacion
Na maart DUO lo tene encuentronan di informacion na Sint Maarten, Aruba, Corsou y Boneiro. Durante e encuentronan aki futuro studiantenan y nan mayornan ta ricibi informacion tocante financiamento di estudio, e burgerservicenummer (BSN) y otro asuntonan practico cu mester regla ora ta trata di un estudio na Hulanda.
Oficinanan di servicio temporal
DUO lo habri oficinanan di servicio temporal tambe na Saba, Sint Eustatius, Sint Maarten, Boneiro y Aruba. Na Corsou desde april 2025 ya caba a habri un oficina di servicio pa un periodo mas largo.
No solamente studiantenan, pero tambe ex studiantenan por acudi aki cu nan preguntanan. Nan por haya mas informacion tocante pago bek di nan debe di estudio, por ehempel den valuta local contra gastonan mas abou of reduccion di e suma mensual. E oficina di servicio ta pa personanan cu tin problema cu pago of tin un atraso den pago, pasobra aki nan ta haya ayudo di forma personal y por busca solucion adecuado hunto cu un colaborado.
Mas informacion tocante e encuentronan di informacion y e oficinanan di servicio por haya riba duo.nl/bezoekcariben.
