Banco Central di Aruba (BCA) a publica e “Economic Outlook” di mas recien pa e sector fiscal. E publicacion aki ta contene pronosticonan di finansas di gobierno riba termino corto (2025-2026) y termino mediano (2027-2029).
Den e prome mita di 2025, Gobierno di Aruba (GoA) a registra un surplus fiscal cu a sobrepasa esun di e mesun periodo di 2024. Entradanan halto di impuesto tabata e contribuyente principal, mientras cu entradanan no relata na impuesto mas abou y gastonan mas halto a limita e mehoracion general den e balansa fiscal. Na final di e prome mita di 2025, e proporcion di debe y GDP calcula pa GoA a yega na 67,0%, cual ta menos cu e 68,6% calcula na final di 2024.
Pa 2025 den su totalidad, e pronostico pa finansas publico ta estima cu GoA lo registra un surplus fiscal mas grandi compara cu 2024. BCA ta anticipa cu e mehoracion aki lo wordo sosteni door di un economia creciente como resultado di e desaroyo den turismo cu ta sigui fuerte, aunke esaki ta moderando. E proyeccion aki ta asumi cu demanda turistico y domestico lo fortalece crecemento den entradanan di impuesto, mientras reforma den impuesto riba entrada y accijns riba gasolin mas abou lo limita e efecto aki. Mientras tanto, BCA ta premira cu impuesto riba entrada y ganashi, impuesto riba mercancia y impuesto riba benta (BBO) lo ta e impulsonan principal di entradanan di impuesto mas halto. Den e parti di gasto, BCA tambe ta anticipa un aumento den 2025. Gastonan di personal mas halto parcialmente debi na e indexering di 5,7%, hunto cu gastonan mas halto pa mercancia y servicio y inversionnan di capital probablemente lo empuha e aumento den gasto. Pagonan di interes mas abou como resultado di reduccion den debe publico lo duna cierto alivio den e parti di gasto.
Durante e periodo di pronostico 2026-2029, BCA ta proyecta un expansion continuo di e surplus fiscal. BCA ta anticipa cu entradanan di gobierno lo subi, reflehando pa gran parti entradanan di impuesto mas halto a consecuencia di un economia cu ta creciendo. Tambe ta spera cu gastonan lo expande, esaki ta pa gran parti debi na inversion mas halto.
E proyeccion aki ta refleha un escenario basico y consecuentemente ta suheto na un mescla di riesgonan domestico y internacional. Un crecemento economico mas abou cu proyecta, shocknan externo incluyendo tensionnan geopolitico relaciona cu e guera comercial andando y tensionnan actual entre Merca y Venezuela, cambionan den condicionnan financiero externo, gastonan relaciona cu seguridad social y retraso den proyecto di inversion por impacta e resultadonan di e pronostico di finansa publico.
Pa e publicacion completo por bishita www.cbaruba.org.
