Arubaanse Voetbal Bond (AVB) a anuncia oficialmente e partido final di e campeonato den categoria Junioren (U-20), unda cu e ekiponan di S.V. Britannia y S.V. La Fama lo enfrenta otro pa determina ken lo bisti e corona di campeon di Aruba.
E gran final aki lo tuma luga diahuebs, 4 di juni 2026, pa 8:30 di anochi riba tereno di Compleho Deportivo Guillermo Prospero Trinidad (CDGT) na Dakota. Porta di e stadion lo habri un ora prome, pa 7:30 di anochi. Fanaticonan di ambos bando lo por haci uzo di e tribuna parti abou (e parti sin dak), caminda AVB lo tin su cashier disponibel.
Pa e ocacion special aki, e salida di e hungadonan riba tereno lo wordo acompaña pa e Himno di FIFA, sigui pa e Himno di Aruba. AVB lo tin su fotografo oficial presente pa capta e miho momentonan di e partido y e ceremonia di premacion. Pa e entrega di premio, AVB lo otorga 25 medaya y un copa na cada equipo.
Detayenan importante di e reglamento:
- Cambionan y suplente: Pa e wega final aki, AVB ta permiti un maximo di 11 hungado suplente riba banki, di cual por efectua unicamente 7 cambio conforme e reglamento.
- Personal riba banki: Cada organisacion por tin un maximo di 5 persona adulto riba banki (entrenador, asistente, masahista, team leader y un persona extra).
- Control di carnet: Cada equipo mester percura pa tin nan carnet y e formulario di wega debidamente yena na tempo, pa asina e arbitro por haci e control necesario.
- Cooling-Break: E arbitro lo stipula e minuutnan di cooling-break si e ta considera esaki necesario durante e partido.
- Warming-up: AVB ta pidi e entrenadornan pa cuminsa cu e warming-up trempan pa asina e partido por inicia exactamente pa 8:30 di anochi.
Definicion den caso di empate:
Si na final di e tempo reglamentario e partidonan keda empata, lo no hunga tempo extra. Lo pasa inmediatamente pa e tanda di tironan penal. E prome tanda lo consisti di 5 penal pa cada equipo. Si e empate persisti, lo sigui cu e tironan den forma di “sudden death” te ora cu tin un ganador oficial.
