Despues di e proceso di evaluacion pa e huesnan di industria y e voto di e publico, T2 Sourdough Boutique y e Bread Sommelier Zaida Everon a wordo anuncia oficialmente como ganadornan den dos categoria prestigioso na e Caribbean Baking Awards 2026 na Sint Maarten:
Professional Excellence Category: Best Bakery Shop of the Year
Specialty Baked Category: Best Bread or Dough-Based Product
E victoria dobel aki ta resalta e impacto di un filosofia basa riba ciencia biologico, fermentacion natural, y e compromiso di ofrece pan cu ta nutri e comunidad di Aruba.
E Ciencia tras di e Victoria
Funda pa Zaida Everon, ex-docente di biologia y e unico Certified Bread Sommelier den nos region, T2 Sourdough Boutique ta opera como un laboratorio artesanal unda e proceso biologico di fermentacion largo ta e curason di e panaderia. T2 ta duna e pan e tempo y e amor cu e mester pa fermenta lentamente y desaroya naturalmente—creando un pan mas sabroso, mas saludabel, y hopi mas facil pa digeri.
“Nos ta ricibi e victoria aki cu hopi humildez y gratitud,” Zaida Everon te expresa. “E logro aki no ta pertenece solamente na nos ekipo chikito cu ta traha cu tanto dedicacion tur dia,
sino tambe na e comunidad di Aruba cu ta confia den nos proceso. Pa nos, esaki ta un confirmacion cu ora nos keda fiel na e ciencia, honra e tradicion di fermentacion natural, y cuida cada detaye di e pan, nos por crea algo berdaderamente special pa nos isla.”
Un Trayectoria di Artesania y Calidad
E reconocimiento aki na Sint Maarten ta bin acerca di e trayecto di calidad internacional di e atelier. Na cuminsamento di e aña aki, T2 Sourdough Boutique a ricibi un 2-Star Superior Taste Award for di e International Taste Institute na Brussels pa su croissant di manteca, banda di e evaluacionnan di e Deutsches Brotinstitut pa su pan di centeno: e Berliner Landbrot.
Mientras T2 Sourdough Boutique ta sigui expande su espacio di laboratorio na Noord pa atende su clientela local y internacional, e meta principal ta keda e mesun cos: promove un aprecio mas profundo pa e ciencia, salud, y artesania di e pan natural.
Pa mas informacion tocante e procesonan di fermentacion, e productonan di sourdough, o e atelier, bishita www.t2pan.com o manda un email pa info@t2pan.com.
Tocante T2 Sourdough Boutique
Funda pa Zaida Everon como un tributo na su difunto tata, Tito, T2 Sourdough Boutique (T2Pan) ta un atelier y espacio di produccion artesanal na Noord, Aruba. T2 ta aplica ciencia biologico y tecnicanan di fermentacion largo pa crea pan di sourdough nutricional, Viennoiserie, y especialidadnan di halto nivel pa e comunidad.
