TA BASTA di Danny Marquez tin agenda politico! A nenga di sinta cu Minister Rocco Tjon pero si ta bay protesta cu sindicatonan

0
946

Den un declaracion cu Danny Marquez di TA BASTA a emiti riba su pagina di facebook, e ta confirma cu na dos ocacion el’a wordo yama pa sinta cu Minister Rocco Tjon riba e tematica di abuso di mucha. Sinembargo na dos ocacion el’a nenga di acudi na e reunion. Motibo cu el’a duna ta cu e lo no por/kier sinta cu Minister Rocco Tjon, envista di e situacion cu Rocco a pasa aden.

SOLO DI PUEBLO ta bolbe reitera cu Rocco Tjon no tin ningun sentencia riba e tematica aki. Pues e motibo e ora cu Danny Marquez no kier acudi pa sinta na mesa, mester por ta pa rasonnan meramente politico.

Por confirma esaki tambe, ora cu Danny Marquez diripiente ta mescla e tema di pedofilia cu e tema di 12.6 di sindicatonan. Awor e ta bisa cu TA BASTA ta bay protesta tambe cu sindicatonan pa 12.6. Mas cu claro cu esaki ta confirma e ora cu e agenda di TA BASTA, cu mester ta un noble lucha, pa protehe mucha, bringa pa atende cu abuso di mucha, ta converti den agenda politico.

Ta hopi cuestionabel cu bo kier lucha pa un causa, pero bo no kier sinta cu e minsiter. Danny Marquez mes ta cuestiona cu el’a manda 5 carta sin haya contesta, pero ora el’a haya invitacion pa sinta na mesa y reuni riba e tema, e ta nenga di haci tal.

Ta con bo kier lucha e ora? Si bo no kier sinta na mesa cu minister? Motibo cu bo ta duna, ta pasobra cu bo tin bo mes opinion riba e minister.

Mas cu claro cu e hustificacionnan aki ta decepcionante y ta un decepcion pa tur esnan cu dia 3 di Juli a marcha pa asina busca solucion y atencion pa e problematica aki. No ta kita cu bo por tin bo opinion, pero hecho ta cu bo no ta huez y bo no por tuma un actitud di mucha mal cria, enbes di atende e asuntonan manera homber grandi y profesional.

Nos ta haci un yamada na TA BASTA, pa nan recapacita y pa nan no mescla politica den TA BASTA, pasobra e ora nan lo perde tambe credibilidad mesora.

Ta realmente sorprendente cu awor un organisacion cu a lanta pa bringa contra abuso di mucha, ta subi tereno sindical pa bay protesta contra di Gobierno pa 12.6, asabienda cu esaki a wordo orechestra dor di pandemia.

LEAVE A REPLY

Please enter your comment!
Please enter your name here