Dios ta Dios di orden y respet, nunca e Spirito di Dios ta move caminda tin desorden.
Mescos cu educacion ta bini for di cas, respet tambe ta bini for di cas.
Romanonan 13:1-2 ta para scirbi: Laga tur hende somete nan mes na autoridadnan cu ta goberna. Pasobra no tin autoridad cu no ta di Dios,y esun cu ta existi ta Dios a stablece nan.Pesey esun cu resisti autoridad, a opone e ordenansa di Dios, y esnan cu opone lo ricibi condenacion riba nan mes.
Pa trece respet bek mester tuma medida di disiplina y coreccion cu ta haci dolor, y hopi biaha no ta popular, pero autoridad tin e derechi, pa para bagamunderia sin wak ta ken ta hacie, sea ta hende rico of pober , studia of cu poco scol, dilanti di Dios nos tur ta igual.
Ora yega e momento di entiero di un persona, mester tin respet, pasobra e persona drumi den su caha no tin e autoridad pa bisa su amigonan pa falta respet cu kimamento di tire di brommer of scooter.
E cos ey ta simpel bagamunderia di hende bibo cu no ta respeta dolor di famia y comunidad y ni tampoco e lugar caminda condolencia ta tuma lugar, ni tampoco cura di misa, iglesia, tempel etc, awor mas duro ta cu no ta respeta e siervo di Dios, cu tin cu haci su trabao.
Mester bini cu ley cu tin di pasa den Parlamento, y tambe aproba pa Ministerio Publico, cu esun cu bay kima tire of burn cu brommer of scooter na un lugar cu entiero ta tuma lugar:
TA RICIBI UN BOET ( VERBAAL) DI 10.000 FLORIN.
Esey ta nifica cu e brommer of scooter ta wordo kita for di su donjo te ora e cumpli cu e pago, pasobra e persona ta bon, bon na cabes, sabiendo cu e ta un peliger pa su mes, peliger pa otronan, y falta di respet pa comunidad.y si e ta droga of bebi lo tin boet extra pa maneha bao di influencia di alcohol y droga.
Y si medida no wordo tuma awor aki,pronto nos lo hanja manera ta sosode den exterior cu auto ta wordo kima na momento di entiero y cu tiramento den presencia di tur hende, pues no laga nos ignora e trikinan di diabel.
Palabra di Dios ta spierta nos cu nos ta bibando den tempo trabahoso, y cu comportacion di hende lo bira cada dia mas dificil, ( 2 Timoteo 3:1-9) y cu hende lo tene cuenta cu nan mes, y lo no wak bienestar di otro.
Pesey como mayor, nos mester wak e comportacion di nos yuinan, nan salida y nan entrada. Y un cos masha importante ta pa no duna mucha bao di edad yabi cas, ora nan ta sali, pasobra bo no por controla e ora cu nan ta yega.
Pasobra e gracia di Dios a parece, treciendo salbacion na tur hende,sinjando nos pa renuncia impiedad y deseonan mundano y pa biba huicioso,husto y santo den e siglo presente.( Tito 2:11-12).
Tur yiu mester sa cu nan mester honra nan tata y nan mama, cual ta e prome mandamento cu promesa pa tur cos bay nan bon y pa nan tin bida largo riba e mundo aki.Ora un mucha ta falta respet pa su mayornan e faltando respet na Dios tambe.
Nos mester yega na un acuerdo como mayornan responsabel, pa pone un man duro den e asunto aki, pasobra si nos no tuma un decision awe, mayan cu Dios kier nos ta lamenta.
Orden y Respet mester prevalese. Sinceramente, Pastor Marcel Balootje
