Esun cu ta wordo guia pa Senjor nunca lo cana robes, Senjor semper ta guia den e mihor caminda, y bendiciona ta esun cu ta confia den Senjor.
Salmo 32:8 ta bisa; lo Mi guia bo y sinja bo e caminda cu bo tin cu cana,lo Mi consehabo mi wowo ta riba bo.
Nos Dios ta poderoso e ta guia nos den e caminda di berdad, Cristo Hesus a bisa, ami ta e caminda e berdad y e bida, ni un hende por yega serca e Tata sino ta pa medio di e Yiu.
No tin otro caminda ta E so ta e caminda, tur otro caminda cu no ta esun di Cristo no ta hiba na bida eterna, ta solamente den Cristo nos tin bida eterna, tur otro cu no ta den Cristo Hesus ta hiba un bida sin ningun clase di speransa.
E situacion ta asina serio cu tin caminda cu bo por perde bo bida, ora bo proclama Cristo abiertamente cu Cristo ta e unico caminda, pasobra E ta e unico cu a lanta for di morto despues di tres dia, a subi na cielo y lo bolbe bek bin busca su pueblo.( Juan 14:1-4).
Tur religion , tur organisacion cu no ta proclama Cristo Hesus como guia no tin speransa.
Tene bon cuenta locual e palabra ta bisa: Esun cu tende boso, ta tende na Mi, y esun cu rechasa boso, ta Ami e ta rechasa,y esun cu rechasa Mi, ta rechasa Esun cu a manda Mi.
Bo no por bisa cu bo tin Dios, y bo no tin Cristo , pasobra Hesus a bisa Ami y mi Tata ta un.
Palabra di Dios ta bisa nos hopi cla den Juan 3:36 : Esun cu kere den e Yiu tin bida eterno,ma esun cu no obedece e Yiu lo no mira bida, ma e furia di Dios ta keda riba dje.
Mateo 28:19-20 ta para scirbi: Pesey bay y haci tur e nacionnan disipel di Mi, y batisa nan den nomber di e Tata y di e Yiu, y di e Spirito Santo,sinja nan pa cumpli cu tur loke Mi a ordena boso, y mira Mi ta cu boso semper, te na fin di mundo, Amen.
Nos tur mester di guia di Dios, den nos bida, Senjor ta nos lus, pasobra ta Senjor a saca nos for di scuridad y trece nos na Su lus, y awe nos por ta lus, nos ta cana den lus, y nos ta biba den lus, pasobra lus a vence scuridad.
Ta obligarorio pa cana den e lus di Senjor, pasobra di otro forma scuridad, inmoralidad, maldad, malicia,diablura, idolatria lo domina nos bida.
Ora nos ta cana den Su lus nos ta duna fruta di claridad, nos ta duna fruta di obediencia, nos ta duna fruta di amor y mansedumbre, pasobra e lus di Senjor ta cubri nos bida completo, pasobra ora bo ta cu Hesus bo no por cana den mitar lus, asina cu bo ta mira scuridad kier drenta, reprende e asunto y yama riba e Sanger di Cristo Hesus, pa asina su lus resplande y drecha tur cos.
Dios su guia, ta necesario tur caminda den nos bida, no purba di laga Dios afo, pasobra ora hende ta laga Dios afo , confusion ta drenta y diabel kier goberna, pesey ta imposibel lanta bo yiu sin guia di Senjor.
Tuma tempo awe y busca Senjor su guia pa bo bida, no sigi mas riba bo propio forsa no gamble cu bo bida, pasobra tur cos bon, tur yamada, y tur don ta bini solamente di Dios.
Sinceramente, Pastor Marcel Balootje
