Prome Minister Mike Eman y Minister Gerlien Croes ta representa Aruba na e Kingdom Summit, un reunion di alto nivel entre e gobiernonan di Aruba, Corsou, Sint Maarten y Hulanda, cu ta tuma luga diamars 17 y diaranson 18 di november 2026 na Sint Maarten. E encuentro aki tin como obhetivo principal fortalece cooperacion entre e cuatro paisnan autonomo di Reino Hulandes, promove un dialogo habri tocante e retonan cu cada pais ta enfrenta y identifica oportunidadnan pa traha hunto riba un futuro comparti.
E Kingdom Summit ta representa un iniciativa pa duna un impulso nobo na e relacionnan politico y gubernamental den Reino. Den un mundo cu ta cambia rapidamente, e cuatro paisnan ta busca manera pa fortalece nan relacionnan, basa riba respet mutuo, confiansa y e disposicion pa yuda otro den varios area di interes comun. E reunion ta tuma luga na JW Marriott St. Maarten Beach Resort cu Prome Minister di Sint Maarten, Dr. Luc Mercelina, como anfitrion. E encuentro ta reuni e lidernan politico y alto funcionario di e cuatro paisnan, incluyendo Prome Minister Mike Eman di Aruba, Prome Minister Gilmar Pisas di Corsou y representantenan di Gobierno di Hulanda. Prome Minister di Hulanda, Rob Jetten, no ta participa na e encuentro, debi e situacion politico actual den su gabinete na Hulanda. Jetten a haya ultimo ora ta cancela su biahe pa Sint Eustatius y Sint Maarten pa por continua e deliberacionnan politico na Den Haag. Secretario di Estado pa Relacionnan den Reino Eric van der Burg, ta participa na e Kingdom Summit como representante di Gobierno di Hulanda.
Un vision nobo pa cooperacion den Reino
E Kingdom Summit ta enfoca riba e importancia di un Reino cu no ta limita su cooperacion na e structuranan gubernamental existente, pero cu ta busca oportunidadnan concreto pa cada pais beneficia di un relacion mas estrecho. E iniciativa ta parti for di e reconocemento cu cada pais den Reino tin su propio identidad, responsabilidad, prioridadnan y retonan. Aunke e paisnan ta diferente den tamaño, economia y circunstancianan social, nan ta comparti un historia y un relacion constitucional cu ta brinda oportunidad pa cooperacion den diferente area.
Un di e metanan principal di e encuentro ta pa crea mas continuidad den e dialogo entre e gobiernonan. E intencion ta pa e contacto entre e cuatro paisnan no keda limita na reunionnan cu ta concentra solamente riba problemanan specifico, pero pa establece un manera mas structural di dialoga tocante desaroyo y futuro di Reino. Respet pa e posicion di cada pais, comprension mutuo y e disposicion pa brinda sosten na otro ta forma e base di e encuentro.
Prome Minister Eman lo presenta situacion actual di Aruba
Un di e partinan central di e programa ta e presentacion di State of the Nation door di cada un di e cuatro paisnan. Durante e sesion aki, Prome Minister Mike Eman lo presenta e perspectiva di Aruba riba e situacion actual di pais, e desaroyonan cu ta tuma luga, e logronan alcanza, e retonan cu ainda ta existi y e oportunidadnan pa cooperacion cu otro paisnan di Reino. E presentacion lo brinda Aruba un plataforma pa comparti su experencia como pais autonomo y identifica e areanan unda cooperacion mas estrecho por contribui na solucion pa e retonan cu ta enfrenta.
Entre e asuntonan di importancia pa Aruba ta desaroyo economico, bienestar social, fortalecemento di oportunidadnan pa su poblacion y e necesidad di prepara e pais pa cambionan internacional cu por afecta nos region. E vision cu Prome Minister Eman a presenta anteriormente tocante futuro di Reino ta enfoca riba e importancia di crea mas balor mutuo entre e paisnan. Durante su reunion cu Prome Minister Rob Jetten na Den Haag, dia 30 di october ultimo, Eman a dedica atencion na e Kingdom Summit y e posibilidadnan pa un cooperacion cu ta bay mas leu cu e relacionnan tradicional entre Aruba y Hulanda. Un di e ideanan cu Eman a destaca ta e necesidad pa Reino desaroya iniciativanan cu por beneficia tur su paisnan, aprovechando e potencial, conocemento y capacidadnan cu cada un tin pa ofrece.
Den e contexto aki, Eman a menciona anteriormente e iniciativa relaciona cu establecimiento di Wageningen University & Research na Aruba como un ehempel di con cooperacion den Reino por crea valor adicional. E iniciativa ta ilustra e posibilidad pa Aruba contribui activamente na proyectonan cu por beneficia diferente paisnan, aprovechando su posicion geografico y su conexion cu e region Caribense. E Kingdom Summit ta ofrece un oportunidad pa profundisa e dialogo tocante un vision di Reino unda e cuatro paisnan ta contribui na solucionnan y oportunidadnan comparti.
Minister Gerlien Croes ta participa tambe na reunion ministerial tocante enseñansa
Hunto cu Prome Minister Eman, Minister Gerlien Croes ta representa Aruba na Sint Maarten. Entre su responsabilidadnan ta relacionnan den Reino, enseñansa, hubentud, innovacion y deporte. Minister Croes lo participa tambe na e Ministerieel Vierlandenoverleg Onderwijs, Cultuur en Wetenschap (M4LO), cu ta reuni ministernan responsabel pa enseñansa, cultura y ciencia di e cuatro paisnan di Reino. E reunion ministerial ta tuma luga den e mesun periodo di Kingdom Summit y ta enfoca riba fortalecemento di cooperacion den enseñansa y oportunidadnan pa studiantenan Caribense. Entre e temanan riba agenda ta e conexion entre enseñansa y mercado laboral, enseñansa den diferente idioma, uzo di telefon den klas y e programa Strategic Education Alliance, cu ta dirigi riba fortalecemento di oportunidadnan y exito di studiantenan Caribense den Reino. Tambe lo dedica atencion na cooperacion den proteccion di patrimonio cultural y nominacionnan pa e lista di patrimonio cultural inmaterial di UNESCO.
Cada pais lo presenta su propio retonan y oportunidadnan
Ademas di Aruba, Corsou, Sint Maarten y Hulanda lo presenta nan respectivo State of the Nation. E presentacionnan ta permiti cu cada pais brinda e otro gobiernonan un bista mas profundo riba su situacion actual, e desaroyonan cu ta tuma luga y e prioridadnan cu ta importante pa su futuro. E intencion no ta solamente pa intercambia informacion, pero tambe pa identifica areanan unda e paisnan por complementa otro cu nan experiencia, capacidad y conocemento. E diferencia entre e economianan, e posicion geografico di e paisnan Caribense y e experiencia di Hulanda na nivel Europeo por representa oportunidadnan pa cooperacion.
Den e contexto aki, asuntonan manera seguridad regional, desaroyo economico sostenibel, enseñansa, innovacion y bienestar di e poblacion ta areanan cu por beneficia di cooperacion mas estrecho. E temanan aki ta relevante pa un vision mas amplio di cooperacion den Reino, mientras cu e prioridadnan concreto lo depende di e deliberacionnan durante e Summit.
Dos dia di dialogo entre e lidernan di Reino
E programa oficial ta cuminsa dialuna anochi, 16 di november, cu un cena di bonbini na Bamboo House SXM pa e delegacionnan participante. Diamars 17 di november, e prome dia di Kingdom Summit ta cuminsa pa 10 or di mainta cu e ceremonia di apertura y palabra di bienvenida di Prome Minister di Sint Maarten, Dr. Luc Mercelina. Despues di e apertura, lo tin e presentacionnan di State of the Nation di Aruba, Corsou, Sint Maarten y Hulanda. E presentacionnan aki lo establece e base pa e deliberacionnan, permitiendo cu e cuatro paisnan compronde miho e prioridadnan y retonan di otro. Durante e resto di e dia, e programa ta contempla diferente sesion di dialogo habri, unda e representantenan gubernamental lo intercambia puntonan di bista y explora posibilidadnan pa fortalece cooperacion. Diaranson 18 di november, e segundo dia ta cuminsa cu un evaluacion di e prome dia. E delegacionnan lo continua cu e dialogo, profundisando e temanan presenta y identificando oportunidadnan pa cooperacion futuro. Intencion ta pa e Kingdom Summit conclui cu un slotverklaring, of declaracion final. E declaracion aki lo presenta e conclusionnan principal di e encuentro y por establece un direccion pa e siguiente pasonan den cooperacion entre e cuatro paisnan.
Importancia di un dialogo politico mas structural
Un di e aspectonan importante di e Kingdom Summit ta e posibilidad di establece un plataforma di dialogo directo entre e lidernan politico di e cuatro paisnan. Den Reino Hulandes, cooperacion ta tuma luga mediante diferente structura y mecanismo gubernamental. Sin embargo, e Kingdom Summit ta busca complementa e contacto existente cu un oportunidad pa e lidernan di gobierno dialoga directamente tocante e vision y futuro di Reino. E encuentro ta crea espacio pa discuti no solamente problemanan inmediato, pero tambe preguntanan mas amplio tocante con e paisnan kier desaroya nan relacionnan den futuro. E intencion ta pa crea mas continuidad den e dialogo politico y gubernamental, pa asina fortalece e comprension mutuo di e prioridadnan di cada pais y identifica oportunidadnan pa cooperacion cu beneficio pa tur parti. E enfasis riba respet mutuo ta importante, considerando cu e cuatro paisnan tin nan propio responsabilidad gubernamental y nan propio circunstancianan economico y social.
Delegacion oficial di Aruba
E delegacion oficial di Aruba na Kingdom Summit ta consisti di Prome Minister Mike Eman, Minister Gerlien Croes, Secretario General di Ministerio di Asunto General Robert Candelaria, Hefe di Gabinete di Minister Croes Bernice Schulte, Secretario di Conseho di Minister Indra Hassell-Duarte y Hefe di Prensa Marko Espinoza. E delegacion ta sostene e participacion di Aruba durante e reunionnan oficial y ta contribui na e dialogo entre e cuatro gobiernonan.
Un oportunidad pa defini futuro di cooperacion den Reino
E prome Kingdom Summit ta marca un paso den e esfuerso di e cuatro paisnan pa fortalece nan relacionnan gubernamental y crea mas oportunidad pa cooperacion cu resultadonan concreto. Pa Aruba, e encuentro ta brinda un plataforma pa presenta su vision, comparti su retonan y explora con cooperacion den Reino por contribui na desaroyo di pais y bienestar di su poblacion. E importancia di e Kingdom Summit no ta limita na e reunionnan di 17 y 18 di november, pero ta relaciona tambe cu e posibilidad pa establece un base pa un dialogo mas continuo entre e paisnan. E expectativa ta cu e deliberacionnan lo contribui na un miho comprension mutuo y lo identifica e siguiente pasonan pa cooperacion. E resultadonan concreto lo wordo conoci despues cu e cuatro paisnan conclui nan dialogo y presenta e declaracion final. Cu e participacion di Prome Minister Mike Eman y Minister Gerlien Croes, Aruba ta forma parti di e iniciativa pa fortalece e conexion entre e cuatro paisnan y contribui na un Reino cu ta busca cooperacion den interes di su poblacionnan y e futuro di nos generacionnan.














