Un replica di e temblor di magnitud 6,4 cu a tuma luga diamars na Croacia, a obliga Ivo Zinic, gobernador di Sisak-Moslavina, e condado mas devasta pa e movimento telurico, pa bandona e conferencia di prensa cu e tabata realisando pa miedo cu e edificio lo a cay den otro.
Durante e evento, Zinic a duna di conoce e impacto di e temblor riba bida di e habitantenan di e region, ora cu el a wordo sorprendi pa e aftershocks, cu a produci caida di varios obheto dentro di e instalacionnan.
E temblor tabata e mas poderoso registra den e pais pa loke ta e aña. E epicentro a a keda localisa 47 kilometer zuidoost di e capital, Zagreb, na un profunidad di 10 kilometer.
E movimento telurico por a sinti tambe den zonanan di Bosnia y Herzegovina, Serbia y Slovenia.
Rond di 6 miyon di persona ta biba den e area caminda cu a sinti e temblor. Di acuerdo cu e Ministerio di Interior Croata, te na e momento e temblor a laga un balans di 6 morto y 26 herido (6 den estado grave).
Mientras tanto, medionan local a informa diamars cu e cantidad di fayecidonan lo a subi pa 7. Andrej Plenkovic, prome minister di Croacia, a comunica cu autoridadnan di e pais a proclama dia 2 di januari como dia di luto nacional.
