Hesus a bisa den Mateo 18:19-20: Atrobe Mi ta bisa boso,cu si riba tera, dos di boso bay di acuerdo tocante di cualkier cos,cu nan pidi,esaki lo wordo haci pa nan door di Mi Tata cu ta den cielo. Pasobra caminda dos of tres ta reuni den Mi nomber ey Mi ta meymey di nan.
Pasobra pa medio di dj’E , tur cos a wordo crea, tanto den cielonan como riba tera,visibel y invisibel, sea trononan,of dominionan of gobernantenan of autoridadnan, tur cos a wordo crea pa medio di dj’E y pa E. E ta prome den tur cos, y den dj’E tur cos ta consisti. E ta tambe e cabes di e curpa , e Iglesia,y E ta e principio, e primogenito for di e mortonan, pa E mes por bin haña prome lugar den tur cos.( Colosensenan 1:16-18), Tur esaki ta para scirbi tocante e grandesa y poder di Cristo Hesus y e autoridad cu Dios a dun’E.
Pesey Dios a hals’E te na e alturanan,y a dun’E e nomber riba tur nomber, cu pa e nomber di Cristo Hesus, tur rudia mester dobla di esnan cu ta den cielo, y riba tera, y bao di tera, y cu tur lenga mester confesa,cu Hesus Cristo ta Señor pa e gloria di Dios Tata.
Tur hende cu kier haci algo y laga Dios afo, por conta esey como tempo perdi, pasobra nos tur mester corda Josue a bisa, cu ami y mi cas lo sirbi Señor.( Josue 24:15).
Awendia nos ta mira cuanto deportista, tin nan bida dedica na Señor y ta logrando exito grandi pasobra Señor ta cu nan, pero tambe nos ta mira cuanto a laga placa y wega di placa, materialismo, maltrato, y inmoralidad domina nan bida y nan a perde nan carera como deportista.
Pa lanta un hogar sin Cristo Hesus, ta dificil, pasobra e ta un edificio sin presencia di Dios, pasobra presencia di Dios den un hogar ta bin na prome lugar, ta e presencia di Dios ta haci e diferencia, ta e presencia di Dios ta cambia tur situacion, ta e presencia di Dios ta trece sanacion y liberacion, ta trece pordon y reconciliacion.
Caminda no tin e presencia di Dios, tur clase di maldad y bagamunderia tin entrada, pasobra caminda e presencia di Dios no tey, no tin temor di Dios, ta compentencia, orguyo, mentira y arogancia ta domina, pasobra tur cos ta wordo dicidi carnalmente sin intervencion di Dios, cual ta nos oracion.
Anto tur caminda esaki por wordo nota cu desicionnan tuma sin Dios, ta causa dolor y ta trece perdida, enbes di demostra sabiduria, e ta keda demostra e falta di conocemento di e palabra di Dios, cabesura, capricho y curason duro di hende.
Den e buki di Santiago capitulo 5 :13-16. E palabra di Dios ta siña nos cuanto poder oracion tin y cu nos por aplica oracion tur momento, tur caminda, especialmente den grupo, den cas, den famia, y tambe den gobierno, pasobra ta Dios ta ricibi e honor y gloria.Y no laga nos lubida cu Dios ta riba tur cos.
Tur hende mester recorda, cu solamente Dios ta bon , y esun cu rechasa Cristo Hesus, a rechasa salbacion, y na mesun momento a rechasa e Tata y e Spirito Santo di Dios.
Tur hende mester sa cu esun cu no kere den e Yiu unigenito di Dios, lo bay perdi, pasobra Dios a entrega su Yiu pa tur hende kere den dj’E.
Sinceramente, Pastor Marcel Balootje.
