Colectivo di famianan di personanan desapareci a recupera 10 curpa dera den grafnan clandestino ubica den e estado di Guerrero, zuidwest di Mexico. E dos simannan di indagacion den e municipio di Petallan, den e region conoci como Costa Grande de Guerrero a laga como resultado 10 curpa haya di dos graf clandestino, aunke Margarita Lopez, integrante di e colectivo Buscando Cuerpos, a referi na e corant Reforma cu lo tabata tin mas cadaver na e sitio. Por a aprecia hopi curpa, loke nos por a logra recupera tin entre 3 y 6 luna cu nan a ehecuta nan, esey ta loke e antropologonan ta bisa nos, pero tabata tin curpa mas bieu,” Margarita, mama di Yahaira Guadalupe Baena, un hoben cu ta desapareci desde dia 13 di april di 2011, ora cu el a wordo secuestra pa un commando na Tlacolula de Morelos, Oaxaca, a bisa. Durante e hayasgo di e colectivo di famia di personanan desapareci, a participa tambe elementonan di e Comision Nacional de Busqueda (CNB), di Guardia Naconal, di e Secretaria di Defensa Nacional (Sedena) y Marina (Semar). Memey di e crisis di violencia cu e nacional Latinoamericano ta biba desde final di 2006 ,e Gobierno ta reconoce cu 73.201 persona desapareci den e pais, como tambe hayasgo di 3.978 graf clandestino den e teritorio, caminda cu a exhuma 6.625 curpa te cu awor aki.
