ORANJESTAD – Lider di Partido MAS sra. Marisol Lopez-Tromp y sra. Aquanette Gun di Fraccion di MAS a manda un carta pa manda yama Minister President pa duna cuenta urgentemente relaciona cu problematica di ‘werksters’ den SKOA y scolnan publico. Ta obvio pa tur hende cu un peticion asina no ta corecto. Sr. Miguel Mansur tambe a firma e carta, probablemente sin sa cu e peticion ta eroneo.
Den su contesta, Prome Minister Evelyn Wever-Croes a referi na nos Constitucion y na e ley Instelling Ministeries, e ley di LIM. Por wordo asumi cu sra. Lopez-Tromp conoce e leynan aki. Den caso cu realmente e no conoce e leynan, Gobierno ta dispuesto pa duna e y su fraccion les den e materia aki, pa evita cu nan ta comete e mesun eror den futuro.
A base di nos Constitucion y e ley di LIM, sr.Armando Lampe ta e Minister di Enseñansa. Nos Constitucion conoce solamente responsabilidad ministerial individual. Cu e ta demisionario of no, e ta e unico minister cu por wordo invita door di Parlamento pa aclarea e topiconan cu sra. Lopez-Tromp ta referi na dje.
“Si realmente ta desea di haya aclareacion riba e temanan importante menciona,y sigur si tin urgencia cu ne, mi ta conseha pa den futuro cana e caminda legalmente corecto. Mi lo manda e peticion pa Minister di Enseñansa, cu e peticion pa considera e invitacion dirigi na su persona, manera mester a wordo haci den prome instante caba. Cu gusto mi lo tende si abo of bo fraccion ta desea di haya les pa evita tipo di erornan asina den futuro”, Premier Wever-Croes a finalisa. Un copia di e carta a bay pa sr. Miguel Mansur y pa prensa.