Diamars merdia Minister di Husticia mr. drs Arthur Dowers a ricibi un presentacion na Stichting Reclassering en Jeugdbescherming Aruba riba e uzo di enkelband pa cierto tipo di castigo. E presentacion a inclui entre otro e tema di supervision electronico. Durante e reunion, a presenta un sistema moderno y innovador cu ya ta den uzo exitosamente na Corsou.
E compania ingles, Buddi a duna e presentacion di su sistema di supervision electronico cu ta enfoca riba control, “tracking” y responsabilidad, uzando tecnologia avansa. E sistema lo ta den uzo oficialmente dia 2 di februari proximo.
Ademas di su aplicacion den e sistema penal, e supervision electronico ta ofrece posibilidad amplio cu ta bay mas leu cu solamente sancion y control. Tambe den e area di handhaving administrativo, e sistema por hunga un rol balioso den reforsa cumplimento di reglamentonan y promoviendo un maneho mas efectivo y sostenibel.
Cu e desaroyo aki, Ministerio di Husticia ta sigui implementa solucionnan moderno cu ta contribui na un sociedad mas sigur y responsabel.
