Facultad di Hospitalidad y Turismo (FHTMS) di Universidad di Aruba (UA) den colaboracion cu Facultad di Hospitalidad, Comercio y Deporte (HRSM) di Universidad di South Carolina (USC) ta lansa un encuesta nacional cu e meta pa investiga e balor y impacto di deporte na Aruba. Ta pidi comunidad di Aruba pa nan cooperacion y participacion.
Hopi biaha nos ta lesa y wak cu atletanan ariba tur nivel ta sobresali den exterior. E resultadonan hopi biaha ta mara na e balor y dedicacion cu cada atleta y esnan rond di dje, entre otro entrenadornan, federacionan, mayornan tin pa e deporte. Con importante deporte ta pa un comunidad? Ki impacto e tin pa Aruba? E preguntanan di e encuesta ta relaciona cu participacion individual y como famia, tipo di deporte, y otro factornan cu ta midi e impacto di deporte na Aruba.
UNESCO su initiativa di “Fit for Life” ta diseña pa activa inversion den deporte como parti di e solucion contra falta di actividad fisico, problemanan di salud mental y inigualidadnan social. Den cuadro di esaki mester menciona cu lo coopera cu miembronan di e National Compliance Platform di cual UA ta forma parti cu entre otro Comite Olimpico Arubano, UNESCO Aruba y IBISA.
Segun Dr. Stephen Shapiro di USC: “Pa por compronde e balor y impacto cu deporte tin pa Aruba ta importante pa investiga kiko e comunidad di Aruba su percepcion nan ta y ademas identifica otro factornan positivo y/of negativo relaciona cu deporte na Aruba.”
“E encuesta ta disponibel den 2 idioma, Papiamento y Ingles y ta completamente anonimo. E datonan ta wordo usa specificamente pa estudio aki y ta sumamente importante pa tur hende yena e encuesta completo. E meta ta pa ricibi un bista mas exacto posibel relaciona cu e topico aki.” Sra. Jo-Anne Croes d UA ta informa.
Ta pidi encaresidamente pa yena e encuesta completo usando e siguiente link nan:
- Ingles: https://uofsc.co1.qualtrics.com/jfe/form/SV_3BIJoCrc5Xdzeey
- Papiamento: https://uofsc.co1.qualtrics.com/jfe/form/SV_1TVHORD4VVNQUJg
Ta sumamente importante pa haña hendenan cu ta representa diferente barionan na Aruba, genero y edad. Pesey ta pidi cooperacion den comparti y encurasha otronan pa jena e encuesta.
Pa pregunta of mas informacion por bishita e Facebook page di University of Aruba-FHTMS of comunica cu Stephen Shapiro, Ph.D, University of South Carolina, College of Hospitality, Retail and Sport Management na shapirsl@mailbox.sc.edu of Jo-Anne Croes, Universidad di Aruba, Faculty of Hospitality and Tourism Management Studies jo-anne.croes@ua.aw.
Ban yuda Deporte na Aruba sigui progresa.
