Tur famia mester bin bek na mesa di oracion, pasobra famia mester depende di Dios. y e mesa di oracion ta trece confiansa bek den tur hogar.
Oracion mester wordo haci den nomber di Cristo Hesus , pasobra Cristo Hesus mes a bisa cu tur locual nos pidi e Tata den su nomber, E Tata lo duna nos.
Den Mateo 18: 19 ta para scirbi: Atrobe Mi ta bisa boso, cu si riba tera dos di boso , bay di acuerdo tocante di cualkier cos cu nan pidi, esaki lo wordo haci pa nan door di Mi Tata cu ta den cielo. Pasobra caminda dos o tres reuni den Mi nomber ey Mi ta meymey di nan.
Aki nan nos ta mira cu ta sumamente necesario uni como famia den oracion, pasobra esey ta boluntad di Dios pa nos tur.
E oracion den famia ta trece union den famia, e ta trece pordon den famia, e ta trece respet den famia,e ta trece e comunion cu Dios kier den un famia, pasobra no solamente ta bon pa come hunto como famia, pero tambe ta dushi pa alaba Dios y haci oracion hunto, pasobra eynan Dios ta manda su bendicion.
Un famia cu ta uni den oracion, ta permanece uni, pasobra e enemigo no tin caminda pa drenta, e forsa y poder di oracion den nomber di Cristo Hesus ta corre cu e enemigo.
Kere den Senjor Hesus y lo bo ta salba, abo y bo hendenan di bo cas. ( Hechonan 16:31).
Josue a a bisa ami y mi cas nos lo sirbi Senjor. ( Josue 24:15).
Ora mayornan ta haci oracion den cas, yuinan ta hanja un ehempel pa sigi, y oracion na bos halto pasobra nos no por haci oracion, manera ta scondi, pasobra oracion mester wordo haci den tur libertad, y bunita ta ora tur hende den cas ta participa.
Ma sirbi Senjor boso Dios, e E lo bendiciona, boso pan y boso awa, y lo mi kita enfermedad for di meymey di boso. ( Exodus 23:25).
Ora nos uni hunto como famia den oracion, cadenanan ta wordo kibra, maldicion di generacion ta wordo kibra, nos curason ta uni cu otro, y si tin falta di pordon, heridanan lo wordo sana y pas lo reina den cas.
Ora nos ta uni den oracion den cas tur momento respet lo prevalece y amor lo aumenta den curason di cada un di nos.
Dios lo uni nos, y lo provee pa nos, pasobra caminda Dios mira union eynan Dios ta manda su bendicion.
Hunto nos ta crea un forsa grandi di oracion den presencia di Dios, cu nos ta capas pa haci oracion pa otro famianan pa nan tambe uni y mira bienestar den haci oracion hunto.
Asina nos ta haci oracion constantemente y e palabra di Dios ta bisa den Nehemias 8:10 : No sea tristo pasobra e goso di Senjor ta boso fortalesa.
Oracion mester bira mas cu un custumber, e mester bira un deber pa nos cada un uni y corda bisa otro wak pa bo yega cas tempran pasobra nos tin oracion.
Oracion ta haci tur hende fuerte, oracion haci cu fe, por cambia tur situacion, pasobra pa Dios nada ta imposibel, mas un famia haci oracion, mas fuerte e famia ta den tur locual nan kier logra.
Un famia cu ta haci oracion, ta un famia sabi, pasobra nan ta dedica tempo na Senjor y Senjor mes lo sabi di habri portanan pa nan den tur cos.
Laga Fe y Oracion ta base di bo famia, corda semper esey.
Sinceramente, Pastor Marcel Balootje
