ORANJESTAD – Den e debate politico actual, caminda ta purba di manipula historia di Aruba, documentonan oficial ta papia pa nan mes. Un telex di e agencia di noticia ANP di juli 1990 (referencia: ANP064 4 BIN 139) ta duna un prueba irrefutabel: e decision pa cancela e fecha di independencia di 1 di januari 1996 tabata un acuerdo directo entre e gobierno di Nelson Oduber (MEP) y e minister Hulandes Hirsch Ballin.
Henny Eman no tabatin ningun rol den e decision aki
Mester stop di gaña e pueblo: Henny Eman no tabatin ni un solo rol den e decision di elimina e fecha di 1 di januari 1996. E telex di 1990 ta mustra claramente cu tabata e Prome Minister di e tempo ey, Nelson Oduber, kende a firma e acuerdo pa para e proceso di independencia.
E documento ta bisa textualmente:
“Esaki Minister Hirsch Ballin (Asuntonan Antiano y Arubiano) y e Prome Minister Arubiano Oduber a acorda siman pasa.”
Pakico Oduber a desisti di independencia?
E documento ta revela cu e gobierno di MEP a reconoce e tempo ey cu un independencia total na 1996 no tabatatin garantia pa e pueblo di Aruba. E motibonan principal tabata:
Falta di Garantia di Seguridad: Hulanda no por a duna ningun garantia real pa mantene e estado di derecho democratico ni e integridad territorial di un Aruba independiente.
Perdida di Paspoort Hulandes: Hulanda a rechasa e exigencia pa Arubianonan conserva nan nacionalidad Hulandes despues di independencia.
Deterioro di e Status: Oduber mes a conclui cu un Aruba independiente lo a falta den puntonan esencial y lo a nifica un “deterioro den comparacion cu e actual Status Aparte”.
E hecho riba mesa
E decision pa para independencia tabata un acto consciente di e coalicion di MEP pa proteha e ciudadano Arubiano contra e perdida di seguridad legal y e paspoort Europeo. Cualkier intento pa involucra otro politiconan den e decision aki di 1990 ta wordo categoricamente desmenti door di e prueba historico aki.
E documento ta bisa cu e titulo cla: “INDEPENDENCIA DI ARUBA PA 1 DI JANUARI 1996 NO TA SIGUI”. Un decision di Oduber, confirma na aña 1990, hopi aña prome cu e siguiente gobierno a drenta.
