Segun informacion cu a yega na nos mes di redaccion, e candidato pa Gevolmachtigde Minister di Aruba na Hulanda, señor Baba Hardee, no a pasa su proceso di screening. E proceso aki, cu tabata andando desee hopi luna pasa, ta keda sin ningun tipo di anuncio oficial of comentario publico.
Na Febuari 2025, Eman a declara cu Baba ta cla, sperando algun documento. Despues el’a bisa cu Baba mester “ruim op”. Te cu awe ta reina silencio y e berdad ta keda scondi.
Rumornan ta indica cu posiblemente señor Harde ta sufri di un maleza di Alzheimer den un fase hopi inicial, mientras cu otro fuente ta bisa cu relacionnan personal of profesional cu e tin, tambe a contribui pa e no pasa su screening. Sinembargo, te cu awe, ni gobierno ni señor Harde mes no a sali pa duna claridad riba e situacion.
Ta importante pa nota cu Aruba ta pasa un situacion abnormal y preocupante: ya ta tres luna cu tin un gobierno nobo y siete luna despues di eleccion, pero Aruba aunno tin ningun representante oficial na Hulanda. Esaki ta crea un bashi diplomatico y administrativo, pues Gevolmachtigde Minister ta un funccion clave pa representa interesnan di Aruba den reunionan semanal cu gobierno Hulandes y otro entidatnan importante.
E falta di un representante official ta pone Aruba den un posision hopi debil, sin voz directo den discusionan crucial tocante finansas, apoyo y desarroyo pa e isla. Mientras tanto, pueblo ta keda sin claridad y sin transparencia for di su gobierno, algo cu ta crea desconfiansa den un periodo cu stabilidad politico y administrativo ta crucial pa por move dilanti.
Nos ta keda sigui e desaroyonan y lo sigui informa nos lectornan si algun vocero of minister finalmente sali pa duna claridad riba e fracaso di screening di señor Baba Hardee y con gobierno ta plan pa yena e funccion vacante aki urgente.
