Desde fin di oktober 2025, Oficina Central di Estadistica (CBS) conhuntamente cu Departamento di Labor y Investigacion (DAO) y Banco Central di Aruba (CBA) ta ehecuta e Encuesta di Forsa Laboral 2025 (EFL2025). E encuesta e aña aki ta wordo realisa telefonicamente. Nos kier a informa pueblo cu e encuesta ta den su 4de siman y cu ya hopi hogar a ricibi un yamada y a contribui cu informacion y datonan. Nos ta na mita di e periodo di ehecucion. Pa e motibo aki, nos ta haciendo e peticion pidiendo e cooperacion di tur hogar cu aun lo ricibi yamada for di nos encuestadornan den e siman nan venidero. Ta hopi importante pa bo datos nan tambe forma parti di e analisis.
Mediante e Encuesta di Forsa Laboral 2025 CBS, DAO y CBA ta analisa e desaroyonan den mercado laboral, manera e tasa di empleo y desempleo, e grado di participacion y e nivel di educacion.
CBS, CBA y DAO ta enfatisa cu tur hende cu ta ricibi un yamada y cu ta participa lo haci un contribucion valioso. Ta pidi cooperacion di tur hogar cu ta ricibi yamada pa participa pa asina pais Aruba por tin un bista completo di e desaroyonan actual riba e mercado laboral.
Ademas, nos ta enfatisa cu tur informacion lo wordo procesa anonimamente y lo wordo publica solamente den forma agrega. E privacidad di cada hogar y cada persona cu ta participa na e EFL2025 ta wordo garantisa pa CBS, DAO y CBA.
Un grupo di 11 encuestador(a) lo tuma contacto cu e hogarnan via telefon den siman y den weekend, entre 8or di mainta pa 8or di anochi. E hogarnan lo por ricibi yamada for di un di e siguiente numbernan di telefon: 6997910, 6997911, 6997912, 6997913 ,6997914, 6997915, 6997916, 6997917.
Pa percura cu e proceso continuo eficazmente tuma nota cu a añadi encuestadornan adicional y e numbernan di telefon cu ta wordo uza pa nan ta: 5930802, 5930805 y 5237720 (oficina di Departamento di Labor y Investigacion). Esaki ta e numbernan oficial uza pa e encuestadornan di e EFL2025.
Nos ta gradici tur hogar y tur persona di antemano pa nan participacion na e EFL2025. Pa mas informacion tocante e Encuesta di Forsa Laboral 2025 por tuma contacto libremente cu e team di CBS/DAO di dialuna pa diabierna durante ora di oficina (7:30 am – 4:30 pm), na number di telefon 524-7433/523-7720 of por manda un e-mail na secretariaat@cbs.aw of via directiearbeid@aruba.gov.aw
