Banco Central di Aruba (CBA) a publica e “Economic Outlook” di mas recien. E publicacion aki ta contene pronosticonan economico riba termino cortico (2025-2026) y termino mas largo (2027-2028)1.
CBA ta proyecta cu Producto Domestico Bruto (GDP) real lo crece cu 2,1% na 2025 y 2,9% na 2026, marcando asina un deceleracion compara cu e crecemento di 6,8% registra na 2024. E disminucion aki ta pa un gran parti debi na un crecemento menos fuerte den exportacion turistico (esta +2,3% na 2025 y +2,1% na 2026), cu ta resulta di capacidad limita di sientanan di avion. Consecuentamente, e aumento den consumo den termino real empuha pa turismo (esta +0,8% na 2025 y +0,7% na 2026) tambe ta proyecta di ta modera.
Na 2025, inversion den termino real ta anticipa pa crece marginalmente, mirando cu tin relativamente menos proyecto nobo relata na construccion priva cu ta compensa pa esnan cu a finalisa na 2024. Ademas, ta anticipa cu inversion publico lo baha durante e aña. Pa 2026, e pronostico ta mustra mas favorabel pa inversion den termino real (+5,8%), principalmente door di e construccion planea di un hotel nobo.
Importacion ta sigui e desaroyonan den consumo, inversion y exportacion. Mirando e crecemento abou den exportacion y demanda domestico, probablemente importacion den termino real lo subi cu solamente 0,3% na 2025, prome cu e acelera te na un crecemento di 1,8% na 2026.
Riba termino mediano, CBA ta proyecta cu GDP real lo crece cu 2,4% na 2027 y 2,0% na 2028. E contribuyentenan principal na e crecemento aki den GDP real ta exportacion (mastanto turistico), consumo, y inversion.
Ta anticipa cu e Balansa di Pago (BdP) lo registra surplusnan di Afl. 923,0 miyon na 2025 y Afl. 1.035,5 miyon na 2026. E surplusnan aki ta principalmente debi na mas entrada di turismo. Di otro banda, e expectativa di un crecemento den e economia local y subida den prijsnan global pa servicio ta conduci na salidanan di pagonan relata na servicio. Ademas, e crecemento den exportacion turistico, consumo, y inversion ta pusha mas salida di divisa relata na importacion. Pagonan di dividendo mas halto na exterior tambe probablemente lo mitiga e surplusnan.
Pa loke ta trata desaroyo di prijs, CBA ta proyecta un tasa di inflacion, basa riba un promedio di 12 luna, di 0,9 porciento na 2025, cu e componente di inflacion basico (locual ta exclui cambio den prijs di cuminda y energia) como e determinante principal. Consistente cu e averahe riba termino largo, inflacion ta premira di yega 2,0% na 2026.
Tabel 1 ta resumi e crecemento pronostica den GDP y su componentenan (2024-2026). E publicacion completo ta disponibel riba website di CBA (www.cbaruba.org).
| Tabel 1: Cremento real di GDP y su componentenan 2024-2026 (den %) | ||||
| Indicador | 2024 c | 2025 p | 2026 p | |
| Premiracion actual | ||||
| GDP | 6,8 | 2,1 | 2,9 | |
| Consumo | -0,2 | 0,8 | 0,7 | |
| Consumo priva | 2,2 | 1,4 | 1,3 | |
| Consumo publico | -7,4 | -1,3 | -1,2 | |
| Inversion | 22,4 | 0,3 | 7,0 | |
| Inversion priva | 19,4 | 0,7 | 5,8 | |
| Inversion publico | 345,6 | -9,6 | 43,6 | |
| Exportacion | 9,8 | 2,2 | 2,4 | |
| Exportacion turistico | 9,0 | 2,3 | 2,1 | |
| Exportcion otro cu di turismo | 13,0 | 1,7 | 3,8 | |
| Importacion | 7,8 | 0,3 | 1,8 | |
| Fuente: CBA c = calculacion, p = proyeccion | ||||
1 E Economic Outlook ta contene proyeccionnan cu ta representa suposicionnan y expectativanan di CBA basa riba informacion disponibel te cu januari 2025 (“cut-off date”). E proyeccionnan ta suheto na hopi incertidumbre. E resultadonan realisa, manera publica door di Centraal Bureau voor de Statistiek (CBS), por diferencia di e proyeccionnan di e Economic Outlook di CBA. Consecuentemente, ningun obligacion of garantia ta presenta of implica e precision di e proyeccionnan specifico conteni eyden. CBA ta asumi ningun responsabilidad pa cualkier perdida cu por resulta door di depende riba e informacion di e publicacion aki.
