E dianan ta pasando i aun no tin claridad for di gobierno tokante e Rijkswet financiero cu Hulanda. Hulanda a pone un ultimatum: pa 1 di mei 2025, Aruba mester yega na un acuerdo pa introduci un rijkswet pa supervision financiero paga un interes mas abao riba e prestamo di COVID.
E prome rijkswet cu yama RAFT a yega riba mesa durante pandemia, ora cu ex-secretario di estado Raymond Knops a pone esaki como un condicion pa Aruba haña prestamo. El’a yame “consensus” cual mas bien e tabata un decision unilateral! Pero hopi cos a cambia. Algun luna pasa, Evelyn a convence Hulanda pa kita e draft di RAFT, riba un conseho negativo di raad van state. E ley no ta mas un condicion pa haña e prestamo, pero si ta sirbi awor como un punto di negosacion pa haya interes mas abao.
Gerlien Croes tabata cla for di principio: su opnion tabata cu Aruba mester accepta rijkswet manera cu Hulanda desea.
Di otro banda, AVP di Eman tabata contra. Pero awor, parce cu AVP a cambia di opnion pa cumpli cu condicion di Gerlien pa logra forma Gobierno.
Nos ta keda cu 10 dia pa yega e fecha limite di 1 di mei. Aun no tin noticia di banda di gobierno. Durante e campaña, nan a bisa cu nan lo bay papia cu Hulanda pa buska otro condicion. Hasta a papia di converti e debe den un fondo di desaroyo. Pero e secretario di estado Hulandes cu tabata na Aruba recientemente a laga sa bon cla cu Hulanda no kier mas discusion riba esaki. E mensahe tabata cla: of Aruba ta firma e rijkswet, of nan ta renuncia e posibildad pa duna un interes mas abao.
Ta keda un silencio, silencio prome cu e decision grandi. Aruba tin pa scohe: introduci un sistema di control financiero stranhero, of keda firme den su autonomia cu un cos cu a costa mas caro. Kiko lo pasa? Pa awor, pueblo ta warda, i e tension ta wordo sinti den e silencio…
Tempo di Evelyn, cada tres siman e tabata duna update di e desaroyo. Awor cu nos ta na e deadline, no ta scucha nada nada di Gerlien Croes, e minister encarga cu asuntonan di relacion den reino.
