Un Mericano cu a disparce mientras cu e tabata nabega a wordo haya na bida diadomingo riba lama wanta na su boto, cu tabata e unico cu ainda tabata flota di e embarcacion despues cu esaki a bolter, segun USA Today.
Stuart Bee, di 62 aña, a sali diabierna, dia 27 di november atardi for di un waf deportivo di Port Canaveral (Florida, Merca) abordo di un boto yama Sean Ray di casi 10 meter di largo.
E dia siguiente el a wordo reporta como desapareci pa un miembro di e waf desde cu el a sali, kende a sigura, cu por lo general, Bee no tabata pasa e anochi riba lama.
Coast Guard di Merca a cuminsa di biaha cu un buskeda, cu a inclui e participacion di un avion di transporte C-130 Hercules, y a pidi tur e embarcacionnan di un amplia zona costera di Florida, vigila y informa riba cualkier hayasgo.
Sin embargo, diasabra no tabata tin señal di e marinero. Diadomingo, pa 11’or di mainta, e barco di container Angeles a detecta Stuart mas of menos 138 kilometer for di Port Canaveral.
E nabegante, cu tabata lucha pa no cay for di loke a keda di su boto riba awa, a kita su camisa e dia ey pa zwaai’e y yama asina e atencion, David Micallef di Coast Guard a sigura.
“E ta un storia increibel. Nos ta hopi gradicido pa e barco Angeles y cu tur su tripulacion pa a mantene un vigilancia minucioso,” el a expresa.
Di acuerdo cu Micallef, e boto di Bee a sufri un faya mecanico cu a impidi’e sigui move. Cerca di mey anochi di diasabra, e marinero a lanta pa un rafaga repentino di awa cu a drenta te den su cabina.
Despues cu casi henter su boto a sink, Stuart a maneha pa wanta henter anochi riba e punta dilanti di su boto te ora cu el a wordo rescata.
“Salba bida riba lama ta nos mayor vocacion. Esaki ta un resultado realmente increibel cu ta demostra e vinculo entre tur e marineronan y nos comunidad,” Capitan Mark Vlaun, comandante di Coast Guard di Jacksonville a bisa.
