Esun cu tin horea ta scucha, esun cu tin wowo ta mira, tur locual ta pasando no solamente aki na nos isla, pero rond mundo con e diabel ta ataca e hubentud, den un palabra bisa mortalmente, y e ta e causa cu hopi hoben ta perde nan bida na un edad jong, of ta keda invalido.
Esaki ta un gran berdad cu tur hende mester realisa di dje, nos hubentud mester di oracion, pasobra oracion ta hala mas serca Dios, oracion por scapa nan bida, oracion ta kita nan for di mal caminda.
Si bo mira un grupo di mucha riba caya, haci tur posibel pa bo hanja sa nan nomber, no worry yiu di ken nan ta, ni tampoco nan nacionalidad, y haci oracion,pasobra bo por ta scapando bida di algun hoben.
Ta masha importante pa mucha ta pratica deporte, y hopi cos mas , pero e palabra di Dios ta bisa den Mateo 6:33 : Ma busca prome e reino di Dios, y Su husticia y tur e cosnan aki lo wordo anadi na boso.
Den ningun clase di deporte, of arte no tin salbacion, salbacion ta bini solamente pa medio di Cristo Hesus.Anto un hoben por ta profesional den deporte, of den arte, pero si den su curason no tin un bon relacion berdadero cu Cristo Hesus e hoben ey lo no hereda e reino di Dios.
Pesey nos como mayor tey pa haci nos esfuerso, no ta importa cu e yiu no ta di bo, importante ta pa bo cubri su bida bao di oracion, y asina aleha e malbado for di den su caminda.
Ora accidente pasa, ora tragedia tuma lugar hopi bos ta lanta y hopi hende kier manifesta, pero esun contra ken mester wordo manifesta ta contra satanas cu su compinchi nan. Pasobra ta e enemigo ta bin solamente pa horta , pa mata y pa destrui. Y e unico forma pa manifesta contra di dje, ta haciendo oracion den nomber di Cristo Hesus.
Pasobra e enemigo ta campeon den division y di pone hende contra otro, asina hende ta wak hende y no ta wak e funcion diabolico den e asunto.
Pasobra boso tur ta yuinan di Dios, door di fe, den Cristo Hesus.(Galationan 3;26).
Nos mester haci tur locual ta posibel pa haci oracion y seya nos hubentud bao di e sanger di Cristo Hesus.
Pasobra e palabra ta bisa nos; Pasobra tur esnan cu ta wordo guia door di Spirito di Dios esaki nan ta yiunan di Dios.( Romanonan 8:14).
Awor laga nos splika bon cla cu e Spirito Santo di Dios, no ta guia hende na violencia, rabia, odio, inmoralidad, pleito, palabra malo, desunion, division, depresion, stress y amargura.
E Spirito Santo di Dios no ta hiba ningun hende den sclavitud di droga y alcohol, un hoben cu tin e Spirito Santo di Dios, no ta uni su mes cu ningun geng pasobra esey ta un grupo cu ta cana den scuridad cu arma, buscando malo pa haci, y Spirito Santo di Dios ta lus , mescos cu Dios ta lus y den dj’E no tin nada, nada di scuridad.
Ta nos tur mester haci e esfuerso pa ranca nos hubentud for di gara di e enemigo.
Tur hende sa cu nos ta bibando den tempo trabahoso y dificil, den cual nos ta mira cosnan ta sosode, cu hopi di nos no por kere,pesey nos bista mester ta fiha riba Dios for di unda nos yudansa lo bini.
Dios stima nos hobennan, y ta nos deber di adopta nan tur den oracion.
Sinceramente, Pastor Marcel Balootje
