Dios ta stima hende generoso, pasobra asina nos ta demostra,cu nos ta stima nos prohimo, y nos ta stima Dios.
E palabra di Dios ta sinja nos cu nos mester ta generoso, y cu tin gran bendicion den nos generosidad.
Boso lo wordo enrikesi den tur cos,pa ta generoso na tur ocasion, locual pa medio di nos ta produciendo gradicimento na Dios.2 ( Corintionan 9:11).
Duna y lo wordo duna na boso, un midi bon yena,bon primi,bon sacudi,cu ta basha over,nan lo drama den boso scochi.Pasobra cu mesun midi cu boso midi cune , lo wordo midi bek pa boso.( Lucas 6:38).
Ora nos ta duna na hende den necesidad nos ta presta na Dios, pasobra nos no tin di spera nada di hende, pasobra Dios mes ta zorg pa nos wordo bendiciona.
Ora mayornan ta bendiciona nan yuinan, nan ta creando e banco di amor den cas cu tur hogar mester tin,no pasobra nan ta duna, pero pasobra nan ta obedece Dios.
No wak atras ora bo caba di duna pasobra Dios mes lo wak pa bo, y Dios tin tur cos bao di control.
No duna hende nada kibra of danja cu bo mes no ta usa mas, pero duna hende algo bon limpi y hinte manera bo mes lo aprecia.
No montona tesoro pa boso mes riba tera, caminda mot y frustu ta destrui nan y caminda ladron ta kibra drenta y horta, ma montona tesoro pa boso mes den cielo, caminda ni mot ni frustu no ta destrui nan , y caminda ladron no ta kibra drenta ni horta,pasobra caminda boso tesoro ta eynan boso curason lo ta tambe.( Mateo 6:19-21).
Stima bo prohimo manera bo mes, y ora ta na bo alcanse duna sin discriminacion, duna sin corda ayera kico por a pasa, duna cu amor, mescos cu Cristo Hesus a duna su bida pa nos.
Tin cu ta reparti y toch ta hanja mas, tin cu ta retene mas di loke ta husto,ma tog ta resulta den pobresa. (Proverbionan 11:24)
E hende generoso lo prospera,y esun cu duna di bebe, tambe lo hanja di bebe. ( Proverbionan 11:25).
Esun cu ta tene misericordia di un hende pober ta fia Senjor,y e lo page bek pa su bon obra.( Proverbionan 19:17).
E necesidad di hende no ta temporal, no ta existi temporada pa duna, ta tur momento cu nos por nos mester duna, y Dios lo tin nos premio pa nos den cielo.
No haci cos di pichiri, y pensa riba bo so, cu bo mes, pero habri bo curasaon y sea generoso cu tur hende y bo generacion lo ta bendiciona.
Esun cu ta generoso cu hende, Dios lo mustra su mes generoso cune.
Mi tabata jong, y awor mi ta bieu,ma nunca mi no amira e husto desampara, ni su desendientenan ta pidi pan. Semper e ta misericordioso y ta fia,y su desendientenan lo ta bendiciona. ( Salmo 37:25-26).
Nos mester sinja nos yuinan duna for di chikito, comparti nan pan cu otro muchanan, pa asina generosidad por drenta na curason, pa nan no lanta como mucha cu curason duro.
Y no laga di haci bon y di comparti cu otro, pasobra sorto di sacrificio asina ta agrada Dios.( Hebreonan 13:16).
Ma ken cu tin biennan di mundo,y ta mira su ruman den necesidad,y ta sera su curason pe, ta con e amor di Dios,ta permanece den dje.( 1 Juan 3:17).
Instrui nan pa haci bon, pa nan ta rico den bon obra, pa nan ta generoso y dispuesto pa comparti.
Duna y lo wordo duna na bo.
Sinceramente , Pastor Marcel Balootje
