Esaki no ta algo normal, aunke hopi ta considera violencia relacional como algo normal, pero den bista di Dios e ta diferente, pasobra Dios ta manda e homber stima su muher y e muher respeta y somete su mes na su homber.
Ta hopi bagamunderia tin ta tuma lugar, bo ta bay un cas y mira un discucion, pasobra e homber y muher no por bini na acuerdo cu otro pa haci trabao di cas, pasobra e homber a lanta den cas di su mayornan, caminda tur cos ta wordo haci pe, y nunca e a sinja haci nada pa su mes, cual ta un educacion completamente robes.
Y mesun cos ta sosode cu un mucha muher bunita ta casa, pero e no ta compronde cu e tin di tuma su deber como ama di cas, pasobra e a lanta den un cas caminda tur cos a wordo haci pe, y nunca a mustre con tin cu cuida un cas, cual ta un educacion hopi robes.
Pero ningun di e cosnan ey no tin balor pa e pareha perde respet pa otro y cuminsa ataka otro verbal y fisicamente, tirando cos nan cara di otro, kico mi a haci pabo, con bo tabata ora mi a conoce bo, cu tur e insultonan conoci acompanja pa palabra cu nos tur conoce.
Galationan 5:15 ta bisa: Ma si boso ta morde y ta devora otro, mira pa boso no wordo destrui un door di otro.
Ta un tristesa pa mira amor cambia den violencia , rabia y odio pasobra e palabra di Dios ta bisa den Efesionan 4:31-32:
Laga tur amargura, furia, rabia y calumnia wordo kita for di boso, hunto cu tur malisia. Sea carinjoso cu otro,misericordioso,pordonando otro,mescos cu Dios den Cristo tambe a pordona boso.
Cual ta e ehempel cu yuinan lo ricibi for di mayornan cu constantemente ta den discucion y violencia cu otro, kico e muchanan por sinja for di hendenan asina?
Asina anto laga cada un di boso tambe stima su esposo,manera su mes, y e esposa percura pa respeta su esposo. ( Efesionan 5:33).
Cual ta e beneficio cu un homber por tin pa train den un gym, crea un curpa formal, y bin usa e forsa bruto ey riba su muher na cas, y mescos tambe ta conta pa cu e hende muher.
Bo ta kere ta algo normal cu un hende ta practica mixed martial arts y ta abusa di su esposa/esposo?
Kico tin di gaba, enbes di pasa tempo den intimidad cu otro, manera Dios mes ta manda pa un pareha casa tin cu otro, hende ta broma den nan brutalidad y falta di respet pa otro, mientras cu yuinan ta keda traumatisa di mira tanto violencia.
Esun cu ta stima su esposa ta stima su mes, pasobra nunca ningun hende no a odia su mes carni, ma ta alimente y cuid’E.( Efesionan 4:28-29).
Ta dificil biba cu odio y rabia contra bo esposa/esposo, pasobra e palabra di Dios ta bisa cu si nos no pordona otro Dios tampoco ta pordona nos.( Mateo 6:14-15).
Rabia y no haci pica, medita den bo curason riba bo cama y keda keto. ( Salmo 4:4)
Rabia ma no haci pica,no laga solo baha riba boso rabia y no duna diabel oportunidad.( Efesionan 4:26-27).
No tin ningun beneficio, den pleitamento y bringamento, no ta existi powerplay den un matrimonio, ( Efesionan 5:21) pasobra matrimonio ta establece door di Dios, kende a manda cada un stima otro cu amor firme y berdadero.
Pesey locual Dios a uni , no laga ningun hende separa.
Sinceramente, Pastor Marcel Balootje
