E hardin di Senjor ta henter e mundo, caminda e Evangelio di e Reino di Dios, mester wordo predica, pa tur hende por ta na altura di e plan di Salbacion , cu ta bini directamente for di e trono di e Altisimo.
Pasobra ta un solo Mediador tin entre Dios y hende y su nomber ta Cristo Hesus, E ta e porta pa medio di dj’E nos tin entrada serca nos Tata celestial.
Colosensenan 3:23-24 ta bisa; Tur loke boso haci,haci boso trabao di curason,como pa Senjor,y no pa hende,sabiendo cu for di Senjor boso lo ricibi e recompensa di e herencia.Ta Senjor Cristo ta esun cu boso ta sirbi.
Den e hardin di Dios ningun hende por traha con cu ta, ni tampoco pa nan propio fama, tampoco pa halsa nan mes, pero den tur obediencia ta traha pa e Gloria di Dios, pa Senjor Su nomber wordo halsa y asina nos por wordo reconoce como Su sirbidor.
Pa funciona den e hardin di Dios, mester entrega complementamente, na Dios, y depende riba Dios, pa tur locual nos ta haci, pasobra ta Dios ta nos donjo di trabao, E ta nos Maestro, y nos tur debe obediencia, na Dios.
Laga e pas di Cristo goberna den boso curason,pa cual di berdad boso a wordo yama den un curpa,sea agradecido.
Y tur loke boso ta haci cu palabra of cu hecho, haci tur den e nomber di Senjor Hesus, dunando gradicimento door di dj’E na Dios e Tata.( Colosensenan 3:15-17).
Nos ta yama pa traha den tempo y for di tempo, yama pa agrada Esun cu a yama nos, nos ta emhabador den Cristo Hesus. Nos tin e ministerio di reconciliacion, esey ta nifica cu nos tur cu ta sirbi den e hardin di Dios, tin e autoridad pa reconcilia hende cu Dios, Nos no ta di nos mes pero nos ta pertenece na Dios, Pasobra den Senjor nos tin tur cos.
Tin un meta cu nos mester alcansa den nos bida manera Pablo a bisa; No cu mi a alcansa esaki caba,of cu mi a bira perfecto caba,ma mi ta haci tur esfuerso, pa mi por gara e loke pa cual mi tambe a wordo gara,door di Cristo Hesus. Rumannan mi no ta pretende cu mi mes a gare caba,ma un cos mi ta haci,lubidando loke ta keda atras y aspirando na loke ta dilanti,mi ta haci tur esfuerso pa alcansa e meta, pa hanja e premio di di e yamada celestial di Dios den Cristo Hesus.( Filipensenan 3:12-14).
Den e trabao di Senjor , tur locual ta orguyo tin di cay abao na suela, pa asina humildad y obediencia na Dios por prevalece tur momento, pasobra no ta cu forsa, ni cu poder, pero pa medio di e Spirito di Dios tur cos ta tuma lugar.
Tur cos ta sosode pa medio di e Spirito Santo di Dios, e ta nos guia, y nos Consolador kende ta guia nos na tur berdad.Nos mester busca Su presencia continuamente.
Pesey mi ta roga boso, rumannan pa medio di e misericordia di Dios, pa presenta boso curpanan como sacrificio bibo y santo, aceptabel pa Dios,cual ta boso sirbishi spiritual di adoracion. Y no sea conforme e mundo aki,ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.( Romanonan 12;1-2).
Laga nos sigi cumpli cu e boluntad di Dios den tur cos, pa asina nos por ricibi e galardon for di Senjor den cielo.
Sinceramenente, Pastor Marcel Balootje
