Awe nos por a finalisa tratamento di cambio den nos Constitucion pa ancra e Ombudsman. Dia 9 di september 2020 Parlamento di Aruba a pasa e ley mes di Ombudsman unanimamente. Dia 24 di februari 2021 nos a cuminsa trata e cambio den nos Constitucion pa por ancra e Ombudsman aden. Nos a logra termina segunda tanda pero no a pasa pa votacion mirando cu kier a pidi conseho over e 8 amiendanan cu a keda presenta. 

Reunion a habri na final di tanda 2 unda minister a hiba palabra y despues di esaki a pasa dibiaha pa votacion. Oposicion a pidi punto di ordo y a pidi pa agrega un tercera tanda, cual lo pone nos desvia for di artikel 83 lid 2 di Reglement van Orde. Pa haci esaki debidamente lo mester votacion di tur 21 parlamentario pa bay pro e cambio aki. Lastimamente lider di Fraccion AVP no tawata presente cual a haci’e imposibel pa cumpli cu e peticion di oposicion. Pa e motibo aki a pasa e ora dibiaha pa e ronda di votacion. 

Aki ta sigui un splicacion cortico kico ta un Ombudsman y con importante e ta. 

Ombudsman

Un Ombudsman ta un defensor di pueblo. Un institucion cu lo brinda proteccion na pueblo y nos muchanan. Un caminda cu un ciudadano por acudi ora cu e ta sinti su mes prehudica of cu su derechonan no ta keda respeta door di Gobierno, instancianan semi-gubernamental y otronan cu lo cay bou di e ley aki. 

Ombudsman of e Defensor di Pueblo ta un institucion independiente y imparcial. E Defensor di pueblo mester evalua kehonan encuanto diferente aspecto di e aparato gubernamental y semi-gubernamental. E mester defende e interes di e ciudadano y supervisa e calidad di e servicionan publico den un pais. Cu otro palabra E Defensor di Pueblo lo yuda comunidad investigando nan keho y of denuncia. Alabes E Defensor di Pueblo ta pa yuda e aparato gubernamental pa mehora nan proceso y proceduranan basa riba e resultado di su investigacionnan y informacion adkeri.

Pesey mes E Defensor di Pueblo lo mester tin un enfoke proactivo pa ta den contacto cu publico en general y trata tur keho of denuncia cu e ricibi cu atencion cuidadoso y cu respet. Haci E Defensor di pueblo un realidad ta un di e metanan proponi den e acuerdo di gobernación di Gabinete Wever-Croes I mirando cu e ta fortifica nos estado di derecho y ta aporta na bon gobernacion.

Pues por mira con importante e ombudsman ta pa locual ta trata salvaguardia derecho di tur ciudadano aki na Aruba. Pesey e ta duel mi cu pa e hecho di haci politica, crea duda riba e ley aki sin ningun hecho, y pa crea discordia, awe nos, no Partido MEP, no Partido AVP, pero nos Aruba a sali perdi. Aruba e unico pais den reino cu no tin un ombudsman di cual awe por a keda concretisa, awe oposicion a scoge pa grita contra y pone Aruba su nomber den scuridad pa locual ta trata respet y balor pa derecho humano!

LEAVE A REPLY

Please enter your comment!
Please enter your name here