E prome bataya den e torneo 4X4 a bay estilo Hollywood! E encuentro entre Biba Lekker DT y Sero Blanco DT tabata berdaderamente un thriller, un sambombaso di otro mundo! E gran palacio di pega piedra aya net n’e grens entre Calabas y Kudawecha (of Kudawecha y Calabas si bin “van de andere kant”), a keda sacudi riba su fundeshi c’un forsa di 9.0 riba scala di Richter! E palabra “blackout” a haya significado nobo, shonnan, un ta cos!
Di cuminsamento e bataya a mustra di lo ta bay pareu pareu, y style di un pa tera un pa lama! Tiki tiki, un pa bo, 1.25 pa mi, Team Biba Lekker a keda gatia Sero Blanco te cu a yega halftime cu score di 11-9 na fabor pa Biba Lekker DT. Den pauze claro, banda di tur mamamento di gay y hasimento di chansa, e pasapalonan a skeiro rond manera pan cayente, completamente gratis. Asina mes por a sinti cu tin algo ta colgando den aire, un “vibe” misterioso indicando cu e “zen” dje anochi ey por bolter cualkier ora y cu pocopoco e luga su “Feng Shui” ta cambiando!
Segundo tempo ta bay aden y Biba Lekker ta pika dilanti confortablemente cu score di 17-14! Aki Biba Lekker a sinti nan mes “binnen” caba, pero den un frega di wowo, Sero Blanco ta dal 4 mesa y ta bolter e score pa 18-17 na su fabor! Aki cos a bira “vlam in de pan”! Un pa mi, un pa mi. Biba Lekker ta empata na 18-18, Sero Blanco ta pika dilanti hacie 19-18. Biba Lekker ta responde c’un contra atake y ta hacie 19-19! Pandemonium total! Ya cu den domino no ta existi “time out”, capitan di Biba Lekker ta inventa un strategia nobis nobis: bula coriente! Ata! Coriente a bay, net p’e scuridad cool off e hungadonan di Sero Blanco! Coriente ta wordo restaura, y sensacionalmente ambos ekipo ta bolbe empata na 20-20! Por ultimo, “met de hak over de sloot”, den fluit señal di pito, Biba Lekker ta crusa prome over di finish cu score di 21-20! Un wega fenomenal y barbaro! Keda pendiente shonnan, pasobra e torneo 4X4 ta sigui diasabra awor, 26 di april, cuminsando pa 8’or di anochi, cu e bataya entre Pluma Gang DT y Red Stone DT! Yegaaaa!
