Taekwondo Team Aruba a participa na e di tres camp training Internacional di Corsou organisa pa Olympia Taekwondo Association Curaçao cu e atletanan cu ta preparando pa nan proximo eventonan Internacional y Cas Bon Taekwondo Cup 2026.
Coach y Trainer di Taekwondo Team Aruba hunto cu e team a participa na e training for di Diahuebs dia 26 di Maart te cu Diadomingo dia 29 di Maart. Master Mónica Urrego di Colombia, un atleta cu Medayanan Mundial, Pan Americano y Caribe a duna e prome señal di warming up cu tecnicanan avansa di competencia pa Master Jesus Tortosa for di Spaña, un atleta cu varios Medaya Olimpico, Mundial y Europeo.
Mónica Urrego a duna un charla di planificacion fisico pa e preparacion di eventonan. Guillermo Rodriquez di Venezuela, cuater biaha referee Olimpico a duna un charla di tur locual ta bringamento, for di pisamento te na e reglamentonan nobo.
Diadomingo dia 29 di Maart a usa tur tres veld pa bringa. E infantilnan a bringa cu e protectornan normal ariba veld uno y e cadet, junior y adultonan a bringa cu e sistema electronico Daedo ariba veld dos y tres.
E camp training Internacional di Olympia Taekwondo Association Curaçao tabata completo pa cualkier atleta cu ta preparando pa un campeonato di caliber.
