Hesus a conta di un hende cu a bay pidi tres pan meyanochi pa un biahero. Aunke su amigo a nenga na principio, toch el a lanta y dun’e pa su insistencia. Hesus ta siña nos pa resa cu insistencia, sin cansa, hasta ora ta parce cu Dios ta tarda pa responde nos. Pero nos sa con pa toca e curason di Dios? Door di dialoga cu n’E, como un Tata y amigo cu ta stima nos y E ta infinitamente bon. E ta warda nos semper brasa habri. Hesus a laga un promesa pa nos: Pidi y lo bo haya, busca y lo bo encontra, y bati y porta lo habri pa bo. E oracion no ta pa cambia e boluntad di Dios, sino pa habri nos curason pa ricibi loke Dios ya kier duna nos. E Evangelio ta invita pa no perde speransa den oracion, Dios semper ta scucha, tin biaha E ta responde cu “si”, y tin biaha cu “warda un rato” y tin biaha Dios ta duna nos algo mucho mas miho di loke nos por imagina: Su propio Spirito pa nos por enfrenta e bida cu fe.
Oracion: Señor, duna mi e gracia cu mas mi mester pa mi santificacion den nomber di Hesus di Nazaret. Amen.
