Desde Januari, Aruba su talento di slalom windsurf, Tame Mondra, a impresiona durante e campamento di entrenamento exclusivo na Tenerife, Spaña . E campamento prestigioso aki ta trece e top atletanan di mundo den slalom windsurf y foil hunto. E campamentonan na Tenerife ta popular pa test material nobo manera entro otro valenan, boards, perfecciona tecnica bou varios condicion di biento y lama y siña di experto experencia y profesional.
Esaki ta prome biaha cu Tame ta participa na un programa di un nival asina halto, cu ta duna un bunita oportunidad pa train hunto cu nombernan conoci den mundo di windsurf. Entre otro Tati Frans, Jordi Vonk, Amado Vrieswijk y otro atleta di clase mundial. Durante dos luna Tame a focus completamente riba training fulltime, un inversion tuma cu curashi y cu ta forma parti su mision mas amplio pa subi den rango den e mundo di windsurf competitivo.
Na e momento aki Tame ta entre e top 10 di atleta hoben mundialmente den e kategoria U-21. E aña aki Tame ta dicidido pa bai pa un lugar den e top 5. Su entrenamento intensivo durante e winter training tabata un paso crucial pa prepara pa un aña di competencia demandante su dilanti. Cu e cambio reciente pa velanan Point-7 y FMX-boards Tame ta sinti su mes sigur y cu energia y cla pa competi pa un logar riba scenario di e prestigioso PWA World Cup Tour y evento di IFCA Slalom.
Tame a hasi historia como e prome windsurfer Arubano cu ta bira parti di e Point-7 Youth Talents Team. Tocante su ambicion Tame ta bisa: “Cambiando pa Point-7 y FMX-boards ta manera bo ta conduci un Ferrari riba awa. Mi ta gradici e dos marka aki pa e bon bini caluroso den nan team y un danki special pa mi mayornan pa nan sosten financiero cu ta haci tur esaki posibel.”
Medio April Tame lo regresa Aruba pa cuminsa cu di siguiente fase di su mision. E lo cuminsa train intensivamente pa e prome evento di PWA World Cup, cu lo tuma lugar na Aruba como parti di Aruba Hi-Winds. Esnan interesa por sigui Tame riba media social (Tame Mondria / tamearu20) y via e website di Point-7 www.point7.com.
E atleta ambisioso hoben aki nota solamente representa Aruba riba e escenario mundial; e ta mustra tamba kiko por logra cu traha duro cu pasion y dedicacion. Tene cuenta cu Tame mientras e ta haci su esfuerso pa logra medaya y sigui su soño pa bira un de e mihor windsurfer slalom di mundo.
