Den cuadro di dia di tata, tatanan y futuro tatanan cu ta traha na Setar a sera conoci cu e proyecto Best Dad Ever. Ariba diabierna 16 di juni ultimo Fundacion Telefon pa Hubentud Aruba a duna informacion na e tatanan y futuro tatanan tocante e proyecto Best Dad Ever. E sesionan di informacion a ser organisa pa e Departamento di Recurso Humano di Setar N.V.
Best Dad Ever ta un proyecto cu ta stimula participacion di tata y futuro tata den bida di nan yiu. Durante 10 sesion e tatanan y futuro tatanan ta ricibi tips, informacion y conocemento con nan por ta mas involucra den bida di nan yiu. Durante di e sesionan diabierna ultimo e tatanan/ futuro tatanan tawatatin hopi pregunta tocante educacion y involucracion den bida di nan yiu. E tatanan/ futuro tatanan tawata sumamente entusiasma.
Despues di e sesionan diferente tata/ futuro tata a registra nan mes pa participa na Best Dad Ever. Best Dad Ever por tuma lugar danki na sosten di Setar N.V, Web Aruba N.V, Aruba Airport Authority N.V. y The Salamander Group.
Pa mas informacion tocante Best Dad Ever por tuma contacto cu Fundacion Telefon pa Hubentud Aruba via nos facebook: https://www.facebook.com/telefon.hubentud/, email: telhubentud@gmail.com of telefon 5886138/ 5884011.
