Den un reciente Ministeriële Beschikking (MB3), Ministro di Transporte, Integridad, Naturalesa y Asunto di Adulto mayor, Ursell Arends, a introduci un serie di decision nobo cu tin como obhetivo pa haci e proceso di transferencia di permiso pa taxi mas transparente y husto. Un di e punto principal ta e formacion di un comision independiente cu lo asesora riba e peticionnan di transferencia den e casonan excepsional, manera problema di salud grave of otro situacion urgente. E decision nobo aki ta reemplasa e prome decision di juli 2024, unda a introduci un stop general.
E comision independiente aki lo consisti di tres te cinco miembro cu lo wordo selecciona a base di nan conocemengo y experiencia. Pa garantisa un proceso husto, e taxistanan lo ricibi oportunidad pa propone un of dos miembro pa e comision aki. E comision lo tin un rol fundamental den evalua cada peticion di forma independiente, unda cada caso ta wordo analisa individualmente pa logra un balansa husto.
Un aspecto importante di e reglanan nobo ta cu el a pone un enfasis fuerte riba transparensia. Tur decision cu e ministro lo tuma lo ta a base di e recomendacionnan di e comision lo wordo publica, y tambe e documentonan relevante lo word poni disponibel pa consulta na Staten. Esaki lo duna tanto e pueblo como e taxista di permiso un bista cla riba e proceso di decision, cu ta contribui na confiansa den e gobernacion.
E decisionnan nobo aki ta duna un grado di flexibilidad for di e prome decision.
Cu e maneho nobo aki, e gobernacion ta tuma un paso importante pa bay na un sistema di miho control, cu ta evita bendemento di permiso, unda solamente e casonan familiar cu suficiente motibo real lo ta posibel.
P’e taxistanan esaki kemen cu nan a logra nan obhetivo. Nan a pidi pa revoca e decision y den e mb nobo di 29 di augustus 2024 a cumpli pa revoca e stop general.
