ORANJESTAD – Fundacion Movimiento Ta Bida (FMTB) pa medio di su proyecto Hunto Grandi Grandi Hunto (HGGH) den cooperacion cu Setar a organisa e tayer “Desaroyo Continuo & Digital 60+ “.
Esaki ta den cuadro di e meta di e fundacion pa por capacita nos grandinan den e desaroyo digital. Informacion y formacion riba tereno digital ta un deseo grandi di nos grandinan segun un encuesta haci.
Pa tresluna (dos bes pa siman) representante di SETAR Sra. Kimberley Boekhoudt a ofrece un tayer na 28 persona cu tawata miembronan di diferente gruponan social di hende grandi. E personanan aki nan nan turno a comparti e informacion basico den barionan na diferente lidernan di gruponan 60+ den durante luna di februari di e aña aki den forma di tayernan den e barionan Savaneta, Santa Cruz, Bubali, Playa y Dakota. Na final di e tayernan a organisa un dia informativo pa tur cursista na Cas di Cultura. Diferente banco, compania, instancia y negoshi tabata presente pa presenta sea nan app, nan manera di paga digital y otro informacion balioso pa nos grandinan.
Recien a realisa e di tres fase di e proyecto pa 2021. E biaha aki a ofrece e tayer di cuater siman na interesadonan den luna di september den e barionan, San Nicolas, Paradera, Noord, Dakota, Playa y na Cas di OPPA. Por bisa cu manera a publica e tayernan, nan a yena mesora. Tur persona cu a atende e tayer, a keda feliz y a expresa e deseo na mas info. E informacion di compania y instancianan e biaha aki lo ta parti den diferente charlanan cu lo tene na Centro di Bario Playa Pabao. Motibo ta cu october ta luna di adulto mayor y Proyecto Hunto Grandi Grandi Hunto ta desea di duna e informacion aki na mas hende den un otro forma tambe.
Coordinadora di e proyecto HGGH Sra. Rosa Leon y presidente di FMTB Sr.Rudy Leysner a evalua e proyecto “Desaroyo continuo & Digital 60+ hunto cu representante di SETAR Sra. Juliska Henriquez y e guiadornan di e tayernan. Por bisa cu a alcansa mas cu 300 persona cu a participa den e tayernan aki. Pero sigur ta cu e necesidad grandi ainda t’ey y SETAR ta dispuesto pa sigui yuda na e formacion aki. Un prueba ta e peticionnan cu ta keda drenta!
Minister President E. Wever Croes y Minister U. Arends encarga cu Asuntonan di Adultonan Mayor, a garantisa e sosten na Aruba su Grandinan.
FMTB ta gradici Setar, Cede Aruba, centronan di bario cu a coopera y tur otro instancia y of organisacion, tambe instructornan di e tayernan cu a yuda e Proyecto aki bira un exito rotundo.
