E siman aki dia 13 di oktober 2022, lo cuminsa cu lesnan di actuacion y baile na Fundacion Centro Famia Piedra Plat. Esaki ta un proyecto di Ateliers ‘89 Punto di Beyas Arte Aruba financia pa CEDE Aruba. E proyecto aki ta “Arte den Bario” unda ta purba trese Arte mas serca di nos muchanan y hobennan.
E lesnan lo wordo duna riba diamars y diahuebs for di 4 – 6 pm na Fundacion Centro Famia Piedra Plat, cu ta ceda net banda di Compleho Deportivo Franklyn Bareño.
E proyecto aki tin un duracion di un luna unda e muchanan y hobennan lo presenta un obra di Teatro combina cu baile. Tur e lesnan aki ta completamente gratis danki na e sosten di Ateliers ‘89 Punto di Beyas Arte Aruba y CEDE Aruba.
Den e lesnan aki nan lo haya e tecnica di actuacion, di baile y tambe nan lo prepara hunto cu e docente Sr. Ferdinand Franca riba un obra.
E intencion ta pa saca tur e talento y creatividad di nos hobennan pa asina crea algo hunto. Nan mes lo bin cu e nomber di e obra, e contenido y claro na final con nan lo presente pa publico en general.
Si bo ta un mucha of hoben y bo kier participa? Por yama na e siguiente numbernan: 5855544/ 7309696/ 6995545. Tambe por manda un email na:
centrofamiapp@gmail.com
Bin disfruta di e tremendo lesnan di actuacion y baile y siña hopi mes. No perde e oportunidad aki!
