Diescinco aña pasa Dr. Horacio E. Oduber Hospital a cuminsa y a recluta colega na april aña 2006 pa instala un “Bedrijfs Hulpverleners team”. Actualmente e ta conoci como HVT (HulpVerleners Team) di Hospital. A cuminsa cu dos curso pa luna duna pa Brandweer y Cuerpo Policial. Na oktober 2006 ya 70 miembro di HVT a logra gradua como ‘emergency responder’. Awe na 2021 por conta cu un team di 120 miembro di HVT completamente capacita pa yuda durante cualkier calamidad.
Miembronan di HVT ta actua y purba combati calamidad prome cu autoridad yega pa asina evita un calamidad of evita mas daño cu ta posibel. Nan ta purba salba bida y yuda cu evacuacion. Pues, nan tin un rol importante y Hospital tur aña pa medio di e siman aki ta duna extra atencion na esaki y e importancia di tin nan den cas pa siguridad di pashent y empleado.
Henter siman a tene diferente actividad. A cuminsa dos siman pasa cu un torneo di beach tennis unda por a hunga den team profesional, intermediate y team pa ‘fun’ cu varios premio. A combin’e c’un happy hour pa asina tambe disfruta di compania di otro.
Durante e siman di HVT mes miembronan di HVT a duna training di ‘brand opruiming’ na otro personal di Hospital pa tres dia largo.
Milka Wernet, manager di seguridad na Hospital y alabes na encargo di HVT, a duna di conoce cu e training nan ta hopi necesario mirando cu no sa ki ora un calamidad por presenta y mester ta prepara p’e. E training no ta pa solamente e team di HVT, pero tur otro colega cu tambe por tin un rol na momento di un calamidad. Mas man tin, mas miho.
Esaki ta di tres aña cu ta cera e siman di HVT cu e actividad “HVT Games”. HVT Games ta manera e ‘spel zonder grenzen’ riba lama como tera. Nan a tene tres wega riba lama como tambe na tera, pa cual e teamnan mester a competi contra otro. Esnan cu a participa a disfruta y gosa di un atardi na un manera diferente pafo di trabou. E HVTers a tuma momento pa kita poco stress despues di a topa algun incidente y tambe e pandemia di Covid-19. Nan a traha hopi duro y tabatin mester di algun actividad pa relaha y gosa un rato hunto.
Sra. Wernet ta gradici tur cu a yuda organisa e actividadnan y duna e trainingnan. Ta aprecia cada miembro pa dedica nan tempo na HVT y a reconoce nan pa tur trabou cu nan ta desplega na momento di sucedidonan durante henter aña y e ultimo 15 añanan. Tambe Milka a gradici Hunta di Directiva y tur sponsor pa confia den nan pa asina por tin un siman exitoso yen actividad. Masha danki na cada miembro pa nan sosten y dedicacion!
