Diasabra ultimo, 28 di juni, e centro di pega piedra, e mundialmente famoso Domino Square Garden, un biaha mas tabata e epicentro di otro temblor den mundo di domino! E ekipo “High View”, esta Bou Palo Boys di Alto Vista, a haci su gran debut den un desafio contra e team di Nelson “Snor” Perez, esta Team Snor. Mas cu claro, un y tur cu ta sigui e logronan dje “Max Verstappen” den domino tabata ansioso pa haya sa con e lo maneha presion di un formacion nobo.
Wel, wel. Atrobe nos tin cu bisa cu Team Snor t’e ekipo cu lo yuda bo haya sa si bo ta cay bou categoria “schoenmaker blijf bij je leest”! Den e caso aki, cos a cuminsa sumamente interesante. Ambos ekipo a habri style di fula tera, un p’ami, un p’abo, kani mi pa mi kani bo, y dado momento wega ta tabla na 8 – 8! Den tur e fulamento aki Team Snor a pasa un “clean board”, pero di biaha un dje trabuconan di Bou Palo Boys di Alto Vista, un tal “Baal”, ta dicidi di dal “Snor” Perez mes un sapato blanco bek di biaha! Cos ta pinta hot! Esaki a traha manera un “wake up call” pa Team Snor kendenan ta manera nan ta bisa na Hulanda ta “schakel een tandje bij” y ta bay cu velocidad pa drenta halftime cu score di 11 – 8!
Despues di baha pasa riba e pasapalonan completamente gratis, e segundo tanda ta dal aden y aki ta mustra cu den pauze e ekipo di Snor a manera drenta ‘pitstop’ cambia taira y gearbox completo! Den di dos tanda miembronan di Team Snor ta bay off ora “Snor” Perez ta bolbe haya otro sapato blanco! E echo aki a traha manera un paña cora dilanti toro brabo! Vap vap, Team Snor ta ranca sali bay pa 15 – 13. E guynan di Bou Plao di Alto Vista ta protesta un tiki, pero e mashin brabo di Snor ta bayendo full trot y na final ta Snor Perez mes ta dal e “coup de grâce” y ta gana e ultimo wega pa cera e score cu resultado aplastante di 21 – 13! Bou palo di Alto Vista Boys a keda rosa netchi netchi, no a keda niun nayo! Shonnan, keda pendiente pasobra e temporada 2025 ta mustrando di bira style di “heat wave”!
